Генеральная пракуратура даслала адмову на запыт сваіх калегаў з Кыргызстана аб экстрадыцыі былога кіраўніка краіны, якога вінавацяць на радзіме ў парушэнні шэрагу крымінальных артыкулаў, у тым ліку ў масавым забойстве.
Пасля красавіцкіх падзеяў, калі Бакіеў быў зрынуты з пасады прэзідэнта, ён знаходзіцца ў Беларусі. Эксперт-усходазнаўца Сяргей Богдан лічыць, што знаходжанне Бакіева ў Мінску азначае канец яго палітычнай кар’еры.
- Калі б, напрыклад, Бакіеў апынуўся б у Казахстане, не кажучы ўжо пра Маскву, то сапраўды гэта было б найвастрэйшае пытанне, гэта было б контррэвалюцыя, гэта быў бы плацдарм для вяртання. Але з Мінску ён не зможа вярнуцца. Ён прыйшоў у тое месца, адкуль не зможа вярнуцца.
14 чэрвеня была распаўсюджаная інфармацыя пра сына зрынутага прэзідэнта Кыргызстана – Максіма Бакіева, які быў затрыманы і знаходзіцца пад арыштам у Вялікай Брытаніі. Яго абвесцілі ў міжнародны вышук па абвінавачванню ў парушэнні шэрагу эканамічных злачынстваў.
15-06-2010
Радыё Рацыя
