Кіраўнік беларускай дзяржавы Аляксандр Лукашэнка запатрабаваў ад міністэрства адукацыі звярнуць сур’ёзную ўвагу на мэтавы набор у ВНУ.
"Я хачу папярэдзіць па мэтавіках: людзі павінны разумець, што яны атрымліваюць адукацыю і вяртаюцца на канкрэтнае месца працы", - сказаў прэзідэнт, яго словы прыводзіць БелТА.
Ён звярнуў увагу, што ў гэтым пытанні будзе не важна "замуж, не замуж", адпрацаваць усё роўна давядзецца, і мэтавікі гэта павінны дакладна разумець. Больш за тое, Лукашэнка лічыць, што час адпрацоўкі па мэтавым накіраванні павінен быць значны.
"Не два-тры гады, а мінімум пяць гадоў", - сказаў ён.
Беларускі лідар лічыць, што ад мэтавага набору "нікуды не адысці", бо патрэбны настаўнікі, урачы, аграномы і заатэхнікі на канкрэтным месцы ў канкрэтным рэгіёне.
"І людзі, якія жадаюць паступаць у ВНУ і несці абавязацельствы па мэтавым прызначэнні, ёсць. Іх хапае, таму трэба падтрымліваць. У асноўным гэта дастойныя людзі, якія ідуць і працуюць", - падкрэсліў прэзідэнт.
Якім павінен быць мэтавік
Міністр адукацыі Андрэй Іванец у сваю чаргу падзяліўся меркаваннем, што мэтавік павінен быць не толькі матываваным, але і падрыхтаваным абітурыентам.
Ён нагадаў, што 5 чэрвеня завяршыўся прыём дакументаў на мэтавае навучанне ў беларускіх ВНУ. Вядома, што каля 4,7 тысячы абітурыентаў захацелі стаць менавіта мэтавікамі.
З 6 па 13 чэрвеня іх чакае ўсяго толькі адзін унутраны экзамен па першым профільным прадмеце ў вуснай ці практычнай форме. Залічваць мэтавікоў у ВНУ будуць па 16 чэрвеня.
Як будзе праходзіць экзамен
Як праінфармаваў Іванец, у складзе кожнай прыёмнай камісіі ёсць настаўнік-прадметнік і гэта вельмі важна, бо "ў прафесара могуць быць завышаныя патрабаванні да абітурыентаў".
"Забяспечана аўдыё- і відэафіксацыя, а таксама камфортныя ўмовы, каб абітурыенты не чакалі па тры, пяць, дзесяць гадзін пад дзвярыма. Ужо на працягу гэтага тыдня мы ўбачым вынікі прыёму вуснага экзамену і зможам зрабіць прапановы па далейшым удасканаленні гэтага напрамку прыёму дакументаў", - дадаў міністр.
