Савет міністраў Беларусі сваёй пастановай зацвердзіў палажэнне аб парадку прыёмкі ў эксплуатацыю пускавых комплексаў блокаў БелАЭС.
Дакумент у тым ліку вызначае пералік з 10 дзяржорганаў і арганізацый, якія будуць выдаваць заключэнні пры прыёмцы станцыі ў эксплуатацыю. У прыватнасці, у іх лік увайшлі спецыялізаваная інспекцыя Дэпартамента кантролю і нагляду за будаўніцтвам Дзяржкамітэта па стандартызацыі, органы санітарнага нагляду, Дзяржпрамнагляд, органы пажарнага нагляду, Рэспубліканскі цэнтр дзяржаўнай экалагічнай экспертызы і павышэння кваліфікацыі кіруючых работнікаў і спецыялістаў Мінпрыроды, дзяржаўная інспекцыя працы, органы энергетычнага і газавага нагляду, галоўнае ўпраўленне камандуючага ўнутранымі войскамі, ДАІ. «Старшынёй прыёмачнай камісіі з’яўляецца намеснік міністра энергетыкі, які курыруе пытанні ядзернай энергетыкі, а яго намеснікам — гендырэктар дзяржаўнага вытворчага аб’яднання электраэнергетыкі „Белэнерга“», — сказана ў дакуменце.
Дзяржорганы і арганізацыі з пераліку, зацверджанага пастановай, будуць накіроўваць сваіх прадстаўнікоў у камісію. Дакументам вызначаны функцыі камісіі, яе правы. У прыватнасці, асноўнымі функцыямі з’яўляюцца праверка гатоўнасці пускавога комплексу блока АЭС да бяспечнай эксплуатацыі, ацэнка адпаведнасці патрабаванням ядзернай, радыяцыйнай, прамысловай, пажарнай і экалагічнай бяспекі. Прыёмачная камісія мае права прызначаць у выпадку неабходнасці дадатковыя выпрабаванні асобных канструкцый, збудаванняў, а таксама сістэм і абсталявання. Акт прыёмкі павінен быць зацверджаны пастановай Саўміна на працягу 10 дзён з дня яго падпісання ўсімі членамі прыёмачнай камісіі.
Будаўніцтва АЭС у Беларусі вядзецца па тыпавым расійскім праекце «АЭС-2006». БелАЭС будзе складацца з двух энергаблокаў магутнасцю за 1 200 МВт кожны. Генеральным падрадчыкам выступае «Атамбудэкспарт» (уваходзіць у дзяржкарпарацыю «Расатам»). 21 снежня Мінэнерга Беларусі паведаміла аб завяршэнні этапу энергетычнага пуску, пасля чаго Дзяржатамнагляд выдаў дазвол на права выканання этапнай праграмы доследна-прамысловай эксплуатацыі першага энергаблока. Гэта фінальная і самая працяглая праверка энергаблока перад уводам у працу. 2 лютага Мінэнерга паведаміла, што першы энергаблок БелАЭС выпрацаваў першы мільярд кілават-гадзін электраэнергіі. Чакаецца, што першы блок БелАЭС увядуць у прамысловую эксплуатацыю ў лютым 2021, другі — ў 2022 годзе.
Звязда, 6 лютага 2021
