Затрыманых вечарам 25 кастрычніка ўдзельнікаў акцыі салідарнасці з палітзняволенымі на Кастрычніцкай плошчы Мінска павінны судзіць сёння ў судзе Цэнтральнага раёна.
Як паведаміў праваабаронца Уладзімір Лабковіч, былі затрыманыя шэсць чалавек. Чакаецца, што ўсе шасцёра паўстануць перад судом.
Сярод затрыманых — чатыры актывісты грамадзянскай кампаніі "Еўрапейская Беларусь", якая ініцыявала правядзенне рэгулярных акцый салідарнасці з палітзняволенымі. Гэта Сяргей Казакоў, Алег Рагоўскі, Аляксандр Салдаценка і Алег Рахоўскі, паведамляе сайт "Еўрапейскай Беларусі". Прозвішчы яшчэ двух затрыманых пакуль невядомыя.
Акцыі салідарнасці з палітзняволенымі праводзяцца з 21 кастрычніка. Яны праходзяць па адным сцэнарыі: супрацоўнікі міліцыі пачынаюць разганяць і затрымліваць удзельнікаў, як толькі тыя з`яўляюцца на Кастрычніцкай плошчы.
У першы дзень былі затрыманыя Аляксандр Валанцэвіч і Сяргей Чаравяк, якіх асудзілі на сем і пяць сутак адміністрацыйнага арышту адпаведна. 24 кастрычніка затрымалі каардынатара "Еўрапейскай Беларусі" Максіма Вінярскага — ён асуджаны на 10 сутак арышту.
Працэсы праходзяць у судзе Цэнтральнага раёна, усе асуджаныя прызнаныя вінаватымі ў парушэнні парадку арганізацыі і правядзення масавых мерапрыемстваў.
У панядзелак начальнік міліцыі грамадскай бяспекі ГУУС Мінгарвыканкама Ігар Яўсееў выступіў з відэазваротам да грамадзян. "Тыя, хто заклікае да ўдзелу ў несанкцыянаваных акцыях, і іх удзельнікі будуць прыцягнутыя да адміністрацыйнай адказнасці, а ў выключных выпадках, дзе ёсць дзеянні, якія груба парушаюць грамадскі парадак, — крымінальнай адказнасці", — папярэдзіў ён.
Нягледзячы на гэта, прэс-сакратар кампаніі "Еўрапейская Беларусь" Аляксандр Атрошчанкаў заявіў, што акцыі салідарнасці будуць праходзіць штодзённа да вызвалення палітзняволеных.
Нагадаем, дагэтуль у зняволенні застаюцца лідар "Еўрапейскай Беларусі" Андрэй Саннікаў — кандыдат у прэзідэнты на выбарах 2010 года і каардынатар кампаніі Дзмітрый Бандарэнка, у якога сур`ёзныя праблемы са здароўем.
БелаПАНМінск, 26 кастрычніка 2011
