https://www.kurs.kz/ - Курсы валют в обменных пунктах г. Алматы и других городах Казахстана
 


 





Найти
 
 


“Эўразьвяз не прапанаваў Беларусі нічога канкрэтнага” - Аляксандар Рар


Заяву кіраўнічкі зьнешняй палітыкі Эўразьвязу Кэтрын Эштан наконт мытнага саюзу Беларусі, Казахстану ды Расеі пракамэнтаваў экспэрт Нямецкага таварыства зьнешняй палітыкі Аляксандар Рар.
Рар: Я, шчыра кажучы, не магу зразумець гэтае выказваньне спадарыні Эштан. Чаму яна не казала пра гэта ў Растове-на-Доне, на саміце Эўразьвяз–Расея, дзе ад яе крытыкі на адрас мытнага зьвязу ніхто не пачуў?

Тут вырашальную ролю адыгрываюць палітычныя пытаньні. Эўразьвяз хоча ўдзельнічаць у мадэрнізацыі расейскай эканомікі, таму для яго важна, каб Расея ўвайшла ва Ўсясьветную гандлёвую арганізацыю на тых умовах, якія былі ўзгодненыя раней. А мытны саюз – гэта іншыя перамовы, іншыя магчымасьці. У Эўразьвязу зараз ёсьць пэўны страх, што ён губляе Ўкраіну.

Спадарыня Эштан робіць тое, што рабілі і яе папярэднікі – яна перасьцерагае Беларусь, Украіну ды іншыя дзяржавы ад занадта шчыльных кантактаў з Расеяй, пагражаючы ў адваротным выпадку зачыніць дзьверы ў супрацоўніцтве з Эўразьвязам. Але, па шчырасьці, Эўразьвяз ні Беларусі, ні Казахстану нічога канкрэтнага прапанаваць ня змог.

Таму гэтыя краіны зараз зацікаўленыя ў больш блізкіх эканамічных стасунках з Расеяй.

Дракахруст: А ці можа Лукашэнка разьлічваць на фінансавую дапамогу з боку Эўразьвязу за сваё нежаданьне ўваходзіць у мытны саюз на ўмовах Расеі?

Рар: Калі Лукашэнка разьлічвае на нейкія грошы ад Эўразьвязу, то гэта няправільная тактыка. Такіх вялікіх грошай, якія Беларусі патрэбныя, каб выйсьці з залежнасьці ад расейскай эканомікі, на Захадзе няма, і ніхто ня будзе іх даваць.

5 гадоў Беларусь спрабавала разыграць Захад супраць Расеі і наадварот. Але так і не адкрыла дзьверы заходняму бізнэсу. І зараз Лукашэнка засталася сам на сам з расейскімі дзяржструктурамі ды алігархамі.

Ня думаю, што Захад будзе даваць грошы на падтрыманьне нерэфармаванай беларускай эканомікі, а асабліва ў перадвыбарчы пэрыяд.

Дракахруст: А ў якой ступені можна лічыць, што заява спадарыні Эштан наконт мытнага саюзу – гэта меркаваньне Эўразьвязу?

Рар: Пасада міністра замежных справаў Эўразьвязу была створаная для таго, каб асоба, якая яе займае, рабіла нейкія заявы. Але мне здаецца, што ў яе няма поўнага мандату казаць ад імя ўсіх. Галоўныя краіны Эўразьвязу занятыя зараз зусім іншымі праблемамі. На абмеркаваньне стратэгіі адносна Расеі, Беларусі, Казахстана, калі тыя збудуюць мытны саюз, да гэтага ў Эўразьвязу проста не даходзяць рукі.

Зразумела Эўразьвязу не выгадна, калі ва Ўсходняй Эўропе будзе стварацца іншая інтэграцыйная мадэль. Але канкрэтыкі ў гэтай заяве няма. Мытны саюз будзе будавацца, Эўразьвяз ня будзе гэтаму перашкаджаць. Бо ён ня можа прапанаваць альтэрнатыву, ён сёньня ня можа прыняць такія краіны, як Беларусь і Казахстан нават у асацыяваныя сябры Зьвязу. А крытыкаваць іншыя краіны за тое, што яны лічаць на дадзены момант эканамічна для сябе выгадным – гэта на сумленьні спадарыні Эштан.

17.06.2010  Радыё Свабода          Юры Дракахруст
 
Дата публикации:17.06.2010
Тематика:Новости, В мире
Просмотров:6447
 
Ключевые слова:
Евросоюз
 
 


Комментарии



 



Другие новости по этой теме