https://www.kurs.kz/ - Курсы валют в обменных пунктах г. Алматы и других городах Казахстана
 


 





Найти
 
 


Сімфанічны аркестр і Акадэмічны хор Белтэлерадыёкампаніі рэалізуюць сумесны праект з гуртам Rammstein


Пра гэта паведаміла БелаПАН прэс-служба Белтэлерадыёкампаніі.
Сімфанічны аркестр і Акадэмічны хор Белтэлерадыёкампаніі падпісалі дамову аб супрацоўніцтве са славутым нямецкім рок-гуртом Rammstein.

14—15 верасня ўдзельнікі Rammstein наведалі Мінск, каб папрацаваць над новым праектам, інфармацыю аб якім музыканты трымаюць у таямніцы. Удзельнікі калектываў Белтэлерадыёкампаніі таксама не маюць права выдаваць падрабязнасці.

Пазнаёміцца з удзельнікамі знакамітай рок-каманды і разам папрацаваць у Вялікай студыі Дома радыё беларускім артыстам удалося дзякуючы нямецкаму імпрэсарыа і дырыжору Вільгельму Кайтэлю, з якім Белтэлерадыёкампанія даўно і плённа супрацоўнічае. Ён не першы раз выступае пасрэднікам у арганізацыі падобных праектаў. На яго рахунку тур Disney in concert з аркестрам медыяхолдынга, музыканты якога выканалі шэраг кампазіцый з фільмаў вядомай кампаніі. Разам з Акадэмічным хорам Белтэлерадыёкампаніі ў сакавіку гэтага года Кайтэль вярнуўся з гастроляў Zimmer Tour па Швейцарыі, Аўстрыі і Германіі.

Зараз плануецца сумесны праект з гуртам Rammstein, пра які музыканты ў хуткім часе павінны расказаць самі. "Аднак ужо сёння можна казаць пра тое, што вынік супрацоўніцтва будзе цікавым і здзівіць прыхільнікаў", — гаворыцца ў паведамленні прэс-службы Белтэлерадыёкампаніі.

Гурт Rammstein быў створаны ў 1994 годзе ў Берліне. Музычны стыль спалучае элементы індастрыял-металу і традыцыі нямецкай цяжкай музыкі. Амаль усе песні калектыў выконвае на нямецкай мове. Гурт таксама праславіўся сцэнічным шоу і эпатажнымі тэкстамі. Шоу Rammstein — адно з самых высокатэхналагічных у свеце, а тэхнічны персанал нямецкага калектыву ўваходзіць у лік самых прафесійных і дарагіх у міжнароднай канцэртнай індустрыі.

Адзіны канцэрт Rammstein у Беларусі прайшоў з аншлагам у сакавіку 2010 года на "Мінск-Арэне" ў межах сусветнага тура гурту, прысвечанага выхаду альбома Liebe ist fur alle da.

Аляксей Арэшка, БелаПАН
Мінск, 17 верасня 2018
 
Дата публикации:17.09.2018
Тематика:Культура, Беларусь
Просмотров:472
 
Ключевые слова:
Rammstein Концерт
 
 


Комментарии