Дзярждума Расіі абяцае падумаць над мэтазгоднасцю скарачэння рабочага тыдня да чатырох дзён. Як паведаміў расійскаму выданню "Коммерсантъ" старшыня камітэта Дзярждумы РФ па працы Андрэй Ісаеў, у бліжэйшыя дні камітэт прыме рашэнне аб правядзенні круглага стала па гэтай тэме.

Дэпутат лічыць, што важна не колькасць дзён, а час, які праводзіць чалавек на рабоце. Напрыклад, чатыры дні работы па дзесяць гадзін штодзень эквівалентны стандартнай пяцідзёнцы з васьмігадзінным рабочым днём. Пры гэтым Андрэй Ісаеў прапанаваў абмеркаваць магчымасць увядзення 36-гадзіннага рабочага тыдня з захаваннем зарплат (гэта значыць, дзевяць гадзін у дзень пры чатырохдзёнцы).

Нядаўна Міжнародная арганізацыя працы на пляцоўцы сайта ААН прапанавала краінам-удзельніцам перайсці на чатырохдзённы рэжым работы. "Тыя, хто праводзіць у офісе доўгія гадзіны, нярэдка толькі імітуюць бурную дзейнасць", - сцвярджаюць эксперты МАП. А скарачэнне рабочага тыдня добра паўплывае на здароўе работнікаў і экалогію. На думку спецыялістаў МАП, многія захворванні ўзнікаюць з-за пераработку і стрэсу ў супрацоўнікаў, а той, хто менш працуе, больш прадукцыйны. Экалагічная сітуацыя палепшыцца за кошт зніжэння колькасці паездак на работу.

Ідэю ўвядзення чатырохдзённага рабочага тыдня падтрымліваюць, у прыватнасці, адзін з заснавальнікаў Google Лары Пэйдж і мексіканскі мільярдэр Карлас Слім Элу. Мексіканскі бізнесмен Карлас Слім, які не раз займаў верхнія пазіцыі спіса найбагацейшых людзей планеты па версіі Forbes, раней выказаў меркаванне, што людзі павінны працаваць усяго тры дні на тыдзень, прысвячаючы рабоце па 10-11 гадзін у дзень. Астатнія чатыры выхадныя людзі павінны праводзіць з сям'ёй, займацца сваім здароўем і адукацыяй. Пры гэтым 74-гадовы Карлас Слім упэўнены, што цяпер людзі выходзяць на пенсію вельмі рана. Трэба даць магчымасць ім паўнацэнна працаваць да 70 гадоў, а тым, хто адчувае ў сабе сілы, - нават даўжэй. Тры дні - працаваць, чатыры - адпачываць і займацца іншымі справамі.

У сваю чаргу кіруючы дырэктар кампаніі інтэрнэт-рэкрутменту Headhunter Міхаіл Жукаў лічыць, што пакуль Расіі рана пераходзіць на чатырохдзённы рабочы тыдзень. Паводле яго слоў, толькі калі значная частка эканомікі ператворыцца ў "эканоміку ведаў", а астатняя будзе кіравацца робатамі, можна будзе гаварыць аб тым, каб расіяне маглі больш адпачываць. Нізкая прадукцыйнасць працы і залежнасць бюджэту ад сыравінных даходаў у бліжэйшыя два пакаленні не дадуць магчымасці расіянам перайсці на такі рабочы графік.

Член Грамадскай палаты (ГП) РФ Іван Махначук таксама гаворыць, што ідэя ўвядзення ў Расіі чатырохдзённага рабочага тыдня мае патрэбу ў абмеркаванні, але наўрад ці яе ўдасца рэалізаваць. Паводле яго слоў, скарачэнне рабочага тыдня абавязкова прывядзе да зніжэння росту прадукцыйнасці працы. У той жа час, ён не выключыў, што пры пераходзе на "чатырохдзёнку" можа разглядацца варыянт павелічэння рабочага часу.

У многіх еўрапейскіх краінах працягласць рабочага тыдня ніжэйшая за 40 гадзін: у Італіі і Швецыі ён доўжыцца 36 гадзін, у Францыі працуюць па 34-35 гадзін, у Даніі і Нарвегіі - па 33 гадзіны. Жыхары Нідэрландаў пераважна працуюць чатыры дні, а максімальная працягласць рабочага дня не перавышае 10 гадзін.

Міжнародная арганізацыя працы (МАП) - спецыялізаваная ўстанова ААН, якая займаецца пытаннямі рэгулявання працоўных адносін. Арганізацыя была створана ў 1919 годзе. На сёння яе членамі з'яўляюцца 185 дзяржаў.

7 кастрычніка 2014, Мінск
БЕЛТА