Згодна з прынятым дакументам, памер бюджэту Саюзнай дзяржавы ў будучым годзе павялічаны больш чым на 15%. Прадстаўляючы праект на зацвярджэнне, дзяржаўны сакратар Саюзнай дзяржавы Дзмітрый Мезенцаў паведаміў, што бюджэт Саюзнай дзяржавы на 2025 год па даходах вызначаны ў суме 7328,2 млн расійскіх рублёў.

Даходы бюджэту сфармаваны за кошт штогадовых адлічэнняў з бюджэтаў Рэспублікі Беларусь і Расійскай Федэрацыі. У наступным годзе яны будуць павялічаны больш чым на 15% і складуць 7107,3 млн расійскіх рублёў, у тым ліку 4619,7 млн расійскіх рублёў — адлічэнні Расійскай Федэрацыі і 2487,6 млн расійскіх рублёў — адлічэнні Рэспублікі Беларусь. 

Акрамя таго, у саюзны бюджэт будуць уключаныя даходы, атрыманыя дзяржаўнай установай «тэлерадыёвяшчальная арганізацыя Саюзнай дзяржавы», і рэшткі сродкаў бюджэтаў Саюзнай дзяржавы мінулых гадоў у суме 220,9 млн расійскіх рублёў.

Выдаткі бюджэту Саюзнай дзяржавы на 2025 год запланаваны ў аб’ёме 6943 млн расійскіх рублёў. Сродкі саюзнага бюджэту будуць накіраваны на фінансаванне сямі праграм, двух праектаў і 41 мерапрыемствы Саюзнай дзяржавы.

Бюджэт сфармаваны з прафіцытам у суме 385,2 млн расійскіх рублёў, за кошт якога могуць быць прафінансаваны новыя праграмы, праекты і мерапрыемствы Саюзнай дзяржавы пасля іх зацвярджэння Саветам Міністраў Саюзнай дзяржавы. Сярод іх — праект Саюзнай дзяржавы, які распрацоўваецца, «Стварэнне экспазіцыі музея на тэрыторыі мемарыяльнага комплексу «Буйніцкае поле». 

У адпаведнасці з палажэннямі Дагавора аб стварэнні Саюзнай дзяржавы прыняты парламенцкім сходам бюджэт будзе ўнесены ў Вышэйшы дзяржаўны савет Саюзнай дзяржавы на зацвярджэнне.

Звязда, 12 снежня 2024