Навукоўцы з Балтыйскага Федэральнага ўніверсітэта ім. Канта сумесна з міжнароднымі калегамі распрацавалі наначасткі, якія здольныя забіваць ракавыя клеткі без шкоды для здаровых тканін.

Па словах навукоўцаў, з дапамогай створаных імі ўзораў на аснове аксіду жалеза магчыма ажыццяўляць некалькі тыпаў тэрапіі, якія адрозніваюцца па механізме ўздзеяння на паражоную клетку.

Як распавялі ва ўніверсітэце, у працэсе лячэння рака традыцыйнымі прэпаратамі аднолькава пакутуюць і ракавыя, і здаровыя клеткі, што негатыўна адбіваецца на стане пацыента, таму цяпер актыўна даследуюцца падыходы да лячэння анказахворванняў без выкарыстання агрэсіўных хімічных рэчываў, але з ужываннем накіраванага вонкавага ўздзеяння.

Прыкладам такога лячэння з’яўляецца фотатэрмічная тэрапія-нагрэў жывых тканін інфрачырвоным лазерам. Як растлумачылі спецыялісты, калі ў ракавых клетках будуць утрымлівацца наначасткі, якія добра паглынаюць інфрачырвонае выпраменьванне, то гэтыя тканіны будуць выбарча награвацца прыкметна мацней, ніж тканіны без наначастак, што дазволіць паменшыць негатыўны ўплыў тэрапіі на здаровыя клеткі.

Фотатэрмічную тэрапію магчыма праводзіць сумесна з магнытатэрмічнай — лячэннем, якое выкарыстоўвае нагрэў наначастак, якія знаходзяцца ў тканінах, з дапамогай магнітнага поля. Эксперты адзначылі, што для ажыццяўлення камбінаванай тэрапіі часткі павінны як добра паглынаць аптычнае выпраменьванне, так і быць схільныя для ўздзеяння магнітнага поля.

Менавіта такія ўзоры на аснове магнетыту (змешанага аксіду жалеза) і ферыту кобальту (CoFe2O4) распрацавалі расійскія навукоўцы з БФУ і НІТУ МІСІС, а таксама калегі з Сербіі і Славеніі. Па словах спецыялістаў, распрацаваныя часткі могуць стаць годнай альтэрнатывай прынятым падыходам да лячэння анказахворванняў, паколькі ператвараюць у цяпло амаль усё накіраванае на іх лазернае выпраменьванне (97%), а таксама награваюцца пад уздзеяннем высокачастотнага (сотні тысяч герц) магнітнага поля.

Навуковы супрацоўнік лабараторыі магнітааптычных даследаванняў БФУ ім.І. Канта Антон Анікін адзначыў, што правядзенне некалькіх тыпаў тэрапій з дапамогай аднаго нанаагента павінна станоўча адбіцца на лячэнні за кошт павелічэння эфектыўнасці тэрапіі і памяншэння пабочных эфектаў.

У цяперашні час навукоўцы працуюць над стварэннем кампазітных узораў, якія ўключаюць у сябе некалькі тыпаў наначастак. Як патлумачылі ў ВНУ, за кошт узаемадзеяння паверхняў двух відаў наначастак іх аптычныя і фотатэрмічныя ўласцівасці аказваюцца лепей, як у гэтых частках паасобку.

Звязда, 21 траўня 2024