Прэзідэнт Беларусі Аляксандр Лукашэнка падпісаў указ "Аб пераводзе дзяржаўных органаў і іншых арганізацый на працу ва ўмовах ваеннага часу", піша Telegram-канал "Пул Першага".

У дакуменце ўдасканалены парадак таго, як дзяржаўныя органы і іншыя арганізацыі пераводзяцца з працы ў мірных умовах на ваенны час.

Апроч гэтага, там прапісана, як будзе забяспечвацца ўзгодненае і эфектыўнае ўзаемадзеянне пры ўзнікненні пагроз для нацыянальнай бяспекі, улічваючы змяненне ваенна-палітычных умоў.

"Указам вызначана кола дзяржаўных органаў, на якія распаўсюджваецца яго дзеянне, у тым ліку яно дапоўнена Усебеларускім народным сходам, палатамі Нацыянальнага сходу, Канстытуцыйным і Вярхоўным судамі", - гаворыцца ў паведамленні.

Кіраўнікі дзяржорганаў і некаторых арганізацый пры ўвядзенні ваеннага становішча зараз змогуць атрымліваць воінскія званні.

Улады мяркуюць, што ў сукупнасці гэта дазволіць эфектыўна працаваць дзяржаўнаму апарату ў ваенны час.

Раней Аляксандр Лукашэнка адобрыў праекты Канцэпцыі нацбяспекі і Ваеннай дактрыны. Гэтыя дакументы павінны прайсці праз зацвярджэнне на Усебеларускім народным сходзе, што прапісана ў Канстытуцыі.

Кіраўнік дзяржавы павінен атрымаць праекты гэтых дакументаў пасля дапрацоўкі ў Савеце бяспекі і Мінабароны, а таксама праект рашэння УНС не пазней за 25 сакавіка бягучага года.

Мінск, 4 сакавіка 2024
Sputnik