Прасоўванне НАТА ў бок расійскіх меж і варожая рыторыка дзяржаў блока – нагода для ўвядзення дадатковых мер па бяспецы, заявіў у сераду прэс-сакратар прэзідэнта Расіі Дзмітрый Пяскоў.

Раней літоўскі пасол у Швецыі і экс-кіраўнік МЗС рэспублікі Лінас Лінкявічус прыгразіў "нейтралізаваць" горад Калінінград, калі РФ кіне выклік НАТА.

"Пашырэнне НАТА, прасоўванне ваеннай інфраструктуры НАТА ў бок нашых меж, варожая рыторыка з боку дзяржаў-членаў паўночнаатлантычнага альянсу – гэта ўсё, вядома, нагода для глыбокай занепакоенасці", - сказаў Пяскоў.

Прэс-сакратар дадаў, што гэта таксама з’яўляецца падставай для прыняцця дадатковых мер для забеспячэння бяспекі РФ.

Ён таксама падкрэсліў, што Калінінградская вобласць – расійскі рэгіён, і ён ім будзе заўсёды.

Раней у МЗС РФ таксама адрэагавалі на словы Лінкявічуса, назваўшы яго выказванні элементам інфармацыйнай вайны. Як адзначыла афіцыйная прадстаўніца ведамства Марыя Захарава, у яго няма адпаведных паўнамоцтваў, каб рабіць такія заявы.

Мінск, 28 лютага 2024
Sputnik