Як паведаміў на прэс-канферэнцыі 21 чэрвеня начальнік упраўлення па ўвекавечанні памяці абаронцаў Айчыны і ахвяр войнаў Сяргей Варановіч, падраздзяленні 52-га асобнага спецыялізаванага батальёна знайшлі на гэтым аб`екце астанкі 147 ваеннаслужачых РСЧА, якія загінулі ў лагеры для ваеннапалонных Шталаг 352.

Па выніках раскопак і далейшых даследаванняў былі ўстаноўлены імёны трох загінулых. Гэта — чырвонаармейцы Шамрай, ураджэнец Днепрапятроўскай вобласці, Ізотаў, ураджэнец Омскай вобласці, і Бачарук, ураджэнец Цярнопальскай вобласці.

Урачыстае перапахаванне іх астанкаў адбудзецца 2 ліпеня. На гэта мерапрыемства збіраюцца прыехаць сваякі Ізотава і Бачарука.

Цяпер, як паведаміў Варановіч, працягваюцца пошукавыя работы на тэрыторыі былых могілак лагера ваеннапалонных Шталаг 324 у Гродне. Знойдзены астанкі 132 загінулых, устаноўлены звесткі аб двух чырвонаармейцах. Без уліку 2016 года за чатыры гады працы на гэтым аб`екце знойдзены астанкі 4.066 загінулых. Устаноўлены імёны 839 з іх.

Працягваюцца работы ў Барысаве, на месцы былых могілак лагера для ваеннапалонных Шталаг 382. Знойдзены астанкі 402 загінулых.

Вячаслаў Будкевіч, БелаПАН
Мінск, 21 чэрвеня 2016