У Выканаўчым камітэце СНД у Мінску 23—24 чэрвеня пройдзе пасяджэнне экспертнай групы па дапрацоўцы і ўзгадненні праекта плана мерапрыемстваў на 2016—2018 гады па рэалізацыі стратэгіі развіцця фізічнай культуры і спорту дзяржаў — удзельніц Садружнасці да 2020 года. Ён распрацаваны Саветам па фізічнай культуры і спорце на падставе прапаноў краін СНД.

У дакумент унесена больш за 80 мерапрыемстваў, накіраваных на папулярызацыю спорту і здаровага ладу жыцця, развіццё масавага і дзіцяча-юнацкага спорту, клубнай сістэмы арганізацыі фізкультурна-спартыўнай работы з насельніцтвам і спорту вышэйшых дасягненняў.

Вялікі раздзел плана прадугледжвае правядзенне фізкультурна-спартыўных мерапрыемстваў для сацыяльна неабароненых катэгорый насельніцтва, уключаючы інвалідаў, сірот, дзяцей з мнагадзетных і непаспяховых сем`яў, пажылых людзей і ветэранаў спорту.

Асаблівае месца адводзіцца мерапрыемствам, накіраваным на развіццё спартыўнай навукі і медыцыны, інавацыйнага супрацоўніцтва, супрацоўніцтва ў антыдопінгавай сферы, забеспячэнне прафесійнай падрыхтоўкі спецыялістаў і павышэння кваліфікацыі кадраў у галіне спорту, развіццё спартыўных абменаў.

Вялікая ўвага ў дакуменце нададзена развіццю нацыянальных відаў спорту дзяржаў СНД і міжкультурнага дыялогу, арганізацыі міжнародных спартыўных экспедыцый, правядзенню спартыўных і маладзёжных лагераў, садзеянню ў выкарыстанні для спартыўных мерапрыемстваў аб`ектаў турыстычнай галіны, развіццю спартыўнага турызму, стварэнню ўмоў для заняткаў спортам і актыўнага адпачынку ў прыродным асяроддзі.

Дакументам прадугледжаны таксама механізм кантролю над выкананнем плана.

Плануецца, што пасля дапрацоўкі і ўзгаднення плана экспертамі ён будзе ўнесены ва ўстаноўленым парадку на разгляд Савета кіраўнікоў урадаў СНД.

Вячаслаў Будкевіч, БелаПАН
Мінск, 21 чэрвеня 2015