На карце плануецца адзначыць "усе месцы, дзе можна пакаштаваць сапраўдную беларускую кухню". "Гэта можа быць дзічына Святаполка Мірскага ў вішнёвым соусе, "радзівілаўскі" судак у яблыках, традыцыйная палеская поліўка ці галушкі "з душамі", — адзначылі ў аб`яднанні. 

Дадаткам да карты стане зборнік рэцэптаў беларускай кухні з фатаграфіямі і адрасамі кафэ і рэстаранаў, дзе можна пакаштаваць гэтыя стравы. У перспектыве плануецца стварыць электронную версію кулінарнай карты і мабільны дадатак. 

Над картай працуюць эксперты ў галіне кулінарыі, гісторыі, турызму і гаспадары аграсядзібаў. Любы ахвотны можа таксама дасылаць інфармацыю для карты і рэцэпты беларускіх страў. 

Для рэалізацыі праекта БГА "Адпачынак на вёсцы" арганізавала збор сродкаў на інтэрнэт-пляцоўцы ulej.by. На стварэнне карты неабходна 43 млн. рублёў.

Анастасія Салановіч, БелаПАН
Мінск, 17 мая 2015