Урад Беларусі абнавіў праграму развіцця сеткі зарадных станцый для электрамабіляў, адпаведная пастанова апублікавана ў чацвер на нацыянальным прававым інтэрнэт-партале.

На 1 студзеня 2024 года сетка ЭЗС у рэспубліцы налічвала 1020 станцый, з якіх 690 належалі вытворчаму аб’яднанню "Беларуснафта". Уласныя зарадныя сеткі развівалі таксама "Белтэлекам", "Віцязь", "Белсельэлектрасеткабуд" і іншыя арганізацыі.

Рэалізацыя праграмы развіцця сеткі ЭЗС прадугледжвае тры этапы. Першы завяршыўся ў 2021 годзе: пабудаваны і ўведзены ў эксплуатацыю 472 электразарадныя станцыі ў Мінску, у абласных цэнтрах і на аўтатрасах.

Другі этап пачаўся ў 2022 годзе і скончыцца ў 2025 годзе. За першы год рэалізацыі на гэтым этапе было ўстаноўлена 87 станцый па ўсёй краіне.

Урад зацвердзіў пералік месцаў для ўстаноўкі ЭЗС у 2024-2028 годзе. У Мінску гэта паркоўкі ў раёне скрыжавання вуліцы Прытыцкага і вуліцы Кунцаўшчына, на Прытыцкага, 58, Ціміразева, 66, Кальварыйская, 24, Уманская, 54, Варанянскага, 19, Брацкая, 18, праспект Партызанскі, 150 А і іншыя. Усяго – 359 месцаў у сталіцы і 479 у рэгіёнах.

Суперхуткія ЭЗС будуць устанаўлівацца з 2024 па 2035 гады ўключна. У Мінску такіх станцый будзе тры – у раёне прыпыначнага пункта "Вакзал", у раёне дыспетчарскай станцыі "Ангарская-4" і МКАД і ў раёне прыпыначнага пункта "Каменная горка-5" і МКАД.

Апроч гэтага, "маланкавыя" зарадкі з’явяцца на трасах Р-23, М-1, М-4, М-6, М-10 і іншых, а таксама ў Брэсце, Калінкавічах, Гродне і Магілёве. Усяго да 2035 года іх плануецца ўстанавіць у колькасці 35 штук.

Мінск, 10 лістапада 2024
Sputnik