Беларускія прадпрыемствы падпісалі ў 2021 годзе 86 пагадненняў і кантрактаў на суму звыш $80 млн у ходзе і па выніку ўдзелу ў выстаўках і форумах, арганізаваных "Белінтэрэкспа". 

Як адзначылі ў кампаніі, у тым ліку ў рамках нацыянальных экспазіцый былі падпісаны пагадненні і кантракты на суму $15,4 млн.

"Найбольш рэзультатыўнымі па сумах падпісаных кантрактаў былі беларускія экспазіцыі ў рамках выставак "Хімія" ў Маскве - $29,3 млн, "ІНАПРАМ. Вялікі прамысловы тыдзень ва Узбекістане", UzProdExpo/UzAgro Expo ва Узбекістане, FoodExpo Kazakhstan - па $13 млн, Gulfood - $7 млн, "Інапрам" у Екацярынбургу - $2,2 млн. У галіновым разрэзе найбольш буйныя сумы кантрактаў на выстаўках адзначаны ў прадпрыемстваў нафтахімічнага сектара, машынабудавання і харчовай прамысловасці", - расказалі ў "Белінтэрэкспа".

У 2021 годзе гэта выставачнае прадпрыемства выступіла аператарам 25 выставак і экспазіцый у 11 краінах: Азербайджане, Арменіі, Беларусі, Кітаі, Казахстане, Аб`яднаных Арабскіх Эміратах, Расіі, Сербіі, Сірыі, Таджыкістане і Узбекістане. Чатыры мерапрыемствы з`яўляліся часткай плана нацыянальных выставак і экспазіцый: выстаўкі ў ААЭ, Кітаі, Расіі, Казахстане. Акрамя нацыянальных мерапрыемстваў, праведзена ў ініцыятыўным парадку і без бюджэтнай падтрымкі 18 экспазіцый за мяжой.

Акрамя таго праведзена тры мерапрыемствы ў Беларусі: выстаўкі "Дзень беларускай навукі-2021" і "Пояс адзінства", а таксама экспазіцыя НАН Беларусі на выстаўцы "Белагра".

У праведзеных за мяжой экспазіцыях, арганізаваных "Белінтэрэкспа", прынялі ўдзел 162 арганізацыі. "А з улікам таго, што некаторыя прадпрыемствы ўдзельнічалі больш за адзін раз, колькасць удзелаў склала 300", - дадалі ў кампаніі.

Агульная выставачная плошча беларускіх экспазіцый больш за 2,4 тыс. кв.м: 1,6 тыс. кв.м у павільёнах і 830 кв.м на адкрытых пляцоўках.

"Найбольшую актыўнасць у выстаўках за мяжой праявілі прадпрыемствы харчовай прамысловасці, а таксама падведамныя прадпрыемствы канцэрна "Белдзяржхарчпрам". Таксама значную актыўнасць праявілі прадпрыемствы Міністэрства прамысловасці, арганізацыі навукова-тэхналагічнай накіраванасці: ДКНТ, Міністэрства адукацыі, НАН Беларусі. Актыўна ўдзельнічалі ў выстаўках прадпрыемствы канцэрна "Белнафтахім". У экспазіцыях прынялі ўдзел 10 прадпрыемстваў прыватнай формы ўласнасці", - паведамілі ў "Белінтэрэкспа".

"У гэтым годзе намі апрабаваны фармат гібрыднага ўдзелу ў выстаўках. Так, у рамках беларускіх экспазіцый на выстаўках Gulfood у Дубаі і "Інапрам" у Екацярынбургу было створана віртуальнае люстэрка экспазіцыі, якое давала магчымасць у анлайн-рэжыме сачыць за мерапрыемствам, азнаёміцца з экспанатамі, назначыць сустрэчы з экспанентамі. Тройчы быў рэалізаваны фармат дыстанцыйнага ўдзелу - на выстаўках у Азербайджане, Кітаі і Сірыі. У гэтым выпадку прадстаўнікі нашай кампаніі арганізоўвалі перагаворы прадпрыемстваў-удзельнікаў з патэнцыяльнымі замежнымі партнёрамі праз відэасувязь", - расказалі на выставачным прадпрыемстве БелГПП.

Сфармаваны намі каляндар выставак за мяжой на 2022 год уключае ў сябе больш за 100 выставак у розных краінах свету. Мы працуем для таго, каб беларускія прадпрыемствы знаходзілі дзелавых партнёраў і развівалі экспартную геаграфію свайго бізнесу", - падкрэслілі ў "Белінтэрэкспа".

22 снежня 2021, Мінск
БЕЛТА