Міжнародная маладзёжная навукова-практычная канферэнцыя "Навуковыя імкненні — 2014" і форум "Навука і бізнес" праходзяць 25—28 лістапада ў Нацыянальнай бібліятэцы Беларусі, 

На думку старшыні ДКНТ Аляксандра Шуміліна, фармат міжнароднай маладзёжнай навукова-практычнай канферэнцыі і маладзёжнага інавацыйнага форуму "з`яўляецца ўнікальным з пункта гледжання наладжвання камунікацый і прафесійных зносін".

"Такая пляцоўка дазваляе навучэнцам і студэнцкай моладзі прэзентаваць вынікі сваіх даследаванняў і наладжваць цесныя кантакты з вядучымі беларускімі і замежнымі вучонымі. Мне б вельмі хацелася, каб праведзеныя мерапрыемствы сталі яшчэ адным цэнтрам прыцягнення таленавітай моладзі ў навуковую сферу. Са свайго боку мы гатовыя аказаць усялякае садзейнічанне ў далейшым навуковым станаўленні найбольш адоранай моладзі і ва ўкараненні яе інавацыйных распрацовак у вытворчасць", — сказаў ён. 

Шумілін адзначыў, што многія маладзёжныя праекты, прэзентаваныя на розных выставах і мерапрыемствах, становяцца патэнцыяльнымі ўдзельнікамі рэспубліканскага конкурсу інавацыйных праектаў, які праводзіць Дзяржкамітэт па навуцы і тэхналогіях. Паводле яго слоў, зараз 79 праектаў (са 164 пададзеных на конкурс) накіраваны для далейшага праходжання экспертызы. Большасць з іх — праекты маладзёжнай намінацыі конкурсу.

Марына Носава, БелаПАН
Мінск, 25 лістапада 2014