10 кастрычніка ў Нацыянальным рэестры прававых актаў зарэгістравана новая пастанова Міністэрства антыманапольнага рэгулявання і гандлю Беларусі, якая тычыцца тарыфаў на транспарціроўку расійскай нафты па тэрыторыі краіны.

Тэксту пастановы ад 7 кастрычніка № 34 "Аб тарыфах на паслугі па транспарціроўцы нафты па магістральных трубаправодах, размешчаных на тэрыторыі Рэспублікі Беларусь" на Нацыянальным прававым інтэрнэт-партале няма. 

Нагадаем, папярэдняя пастанова — № 30 ад 28 верасня — прадугледжвала значнае павышэнне з 11 кастрычніка тарыфаў на паслугі па транспарціроўцы нафты па магістральных трубаправодах адкрытых акцыянерных таварыстваў "Гомельтранснафта Дружба" і "Полацктранснафта Дружба".

Тарыф за 1 тону нета (без падатку на дабаўленую вартасць) па маршруце Унеча (Высокае) — Адамава Застава павінен быў скласці 400,98 расійскага рубля, Унеча (Высокае) — Броды — 172,23 расійскага рубля, Невель (Вялікія Лукі) — Полацк — Высокае — 48,47 расійскага рубля (тарыф на паслугі па прыёме і транспарціроўцы нафты для далейшага яе замяшчэння па напрамках Германія, Чэхія, Славакія, Польшча, Венгрыя, Украіна).

Дзейныя тарыфы былі ўстаноўленыя 1 лютага 2016 года. Па гэтых напрамках яны складалі: 267,32, 114,82 і 32,31 расійскага рубля адпаведна.

Пра тое, што Расія адновіць ранейшыя аб`ёмы паставак нафты беларускаму боку, а Беларусь адменіць рашэнне аб павышэнні тарыфаў на транзіт гэтай вуглевадароднай сыравіны, заявіў сёння журналістам віцэ-прэм`ер Уладзімір Сямашка.