Савет Еўразійскай эканамічнай камісіі (ЕЭК) 12 жніўня прыняў рашэнне часова абнуліць стаўкі ўвазных мытных пошлін на верталёты з масай пустога падрыхтаванага апарата да 1 тоны і на авіяцыйныя поршневыя рухавікі магутнасцю да 200 кВт для лёгкіх лятальных апаратаў да 2 тон.

Стаўкі пошлін зніжаюцца да канца 2017 года.

"Абедзве меры накіраваны на падтрымку галіны авіяцыі агульнага прызначэння. Ні верталёты масай да 1 тоны, ні аналагічныя авіяцыйныя рухавікі ў краінах саюза не вырабляюцца, — адзначыла міністр па гандлі ЕЭК Вераніка Нікішына. — Адпаведна, зніжэнне пошлін створыць больш спрыяльныя ўмовы для галіны авіяцыі агульнага прызначэння, дазволіць больш эфектыўна канкурыраваць па цане, вызваляць сродкі для інвестыцый, зніжаць пазыковую нагрузку".

Часовы характар мер абумоўлены тым, што краіны ЕАЭС вядуць падрыхтоўку да запуску вытворчасці аналагічных тавараў.

Рашэнне набывае моц праз 30 каляндарных дзён з даты яго афіцыйнага апублікавання.

Ірына Турчына, БелаПАН
Мінск, 12 жніўня 2016