Перанесеная сустрэча прэзідэнтаў Казахстана, Расіі і Беларусі Нурсултана Назарбаева, Уладзіміра Пуціна і Аляксандра Лукашэнкі адбудзецца ў пятніцу, 20 сакавіка.

"Сустрэча адбудзецца 20 сакавіка ў Астане. На сённяшні дзень расійская і беларуская бакі пацвердзілі свой удзел", — сказаў Абаеў карэспандэнту інфармацыйнага агенцтва "Новости-Казахстан". Ён таксама дадаў, што прычынай пераносу сустрэчы стаў "шчыльны графік лідараў трох дзяржаў". 

Нагадаем, трохбаковая сустрэча планавалася 13 сакавіка ў Астане. 9 сакавіка Казахстан афіцыйна паведаміў аб правядзенні такой сустрэчы. Паведамлялася таксама, што прэзідэнты трох краін разгледзяць пытанні паглыблення ўзаемнага гандлю і эканамічнага ўзаемадзеяння трох краін, развіццё тэндэнцый у сусветнай эканоміцы і сітуацыю ва Украіне. 

Аднак 11 сакавіка з`явілася інфармацыя пра яе перанос на некалькі дзён. Спачатку пра гэта паведаміла крыніца ў дыпламатычных колах Казахстана, затым інфармацыю пацвердзіў прэс-сакратар Пуціна Дзмітрый Пяскоў. 

Паводле неафіцыйнай інфармацыі, прычынай пераносу стала хвароба прэзідэнта РФ, якую ў Крамлі афіцыйна не пацвярджаюць. 

Афіцыйнае пацвярджэнне пра візіт Лукашэнкі ў Астану ў прэс-службе прэзідэнта Беларусі пакуль не атрымана.

Марына Носава, БелаПАН
Мінск, 16 сакавіка 2015