У Казахстане дадзены старт камандна-штабному вучэнню з міратворчымі сіламі АДКБ «Непарушнае братэрства — 2024». 

Звяртаючыся да ўдзельнікаў вучэнняў, намеснік генеральнага сакратара АДКБ Таалатбек Масадыкаў канстатаваў, што вучэнне праходзіць у складанай міжнароднай абстаноўцы. «Кіраўнікамі дзяржаў — членаў АДКБ прымаюцца неабходныя меры па нарошчванні сіл і сродкаў сістэмы калектыўнай бяспекі для процідзеяння ўсяму спектру сучасных выклікаў і пагроз і ўдасканаленні механізмаў іх прымянення. Міратворчыя сілы АДКБ, з’яўляючыся неад’емнай часткай войскаў (калектыўных сіл), павінны быць у пастаяннай гатоўнасці да правядзення міратворчых аперацый у адпаведнасці з рашэннямі Савета калектыўнай бяспекі АДКБ як на тэрыторыі дзяржаў — членаў арганізацыі, так і за яе межамі па мандаце ААН», — сказаў ён.

Вучэнне накіравана на ўдасканаленне практычных навыкаў і метадаў работы камандзіраў і штабоў пры падрыхтоўцы і вядзенні міратворчай аперацыі, павышэнне зладжанасці нацыянальных міратворчых кантынгентаў і павышэнне ўзроўню іх палявой вывучкі. У ім прымаюць удзел нацыянальныя кантынгенты міратворчых сіл Беларусі, Казахстана, Кыргызстана, Расіі і Таджыкістана, аператыўныя групы Аб’яднанага штаба і Сакратарыята АДКБ. Усяго на вучэнне прыцягнуты больш за 2 тыс. ваеннаслужачых, 500 адзінак бранятанкавай і аўтамабільнай тэхнікі, верталёты Мі-17, Мі-35, самалёты Іл-76 і Сі-295, беспілотная авіяцыя.

«Удзельнікі вучэння пачалі падрыхтоўку міратворчай аперацыі. На гэтым этапе вучэння адпрацоўваюцца пытанні перагрупоўкі міратворчых кантынгентаў у раён фарміравання калектыўных міратворчых сіл АДКБ, зладжвання ў раёне выканання задач і арганізацыі міратворчай аперацыі. Практычныя дзеянні прадугледжваюць выкананне калектыўнымі міратворчымі сіламі АДКБ адпрацоўку вучэбна-баявых задач на блокпастах і пунктах прыёму бежанцаў, пры суправаджэнні калон і грузаў, а таксама аказанне гуманітарнай дапамогі», — дадалі ў прэс-цэнтры.

Звязда, 1 кастрычніка 2024