"Найскладнейшай задачай для нашай машынабудаўнічай галіны з`яўляецца ўтрыманне і ўзмацненне канкурэнтаздольнасці прадукцыі на ўнутраным і знешнім рынках, - сказаў Уладзімір Гусакоў. - Для гэтага ў першую чаргу неабходна забяспечыць устойліва высокую якасць паставак".

Ён выказаў упэўненасць: "Беларуская прадукцыя не павінна ўступаць па якасці лепшым замежным аналагам".

"У вырашэнні гэтай задачы няма дробязей - важны як аптымальныя канструкцыі, сучасныя матэрыялы з функцыянальнымі ўласцівасцямі, тэхналогіі абароны паверхняў, так і электроннае кіраванне, высокатэхналагічная вытворчасць. Мы паспрабавалі комплексна прапрацаваць усе гэтыя пытанні", - заявіў Уладзімір Гусакоў.

У сувязі з гэтым старшыня Прэзідыума НАН вылучыў шэраг ключавых праблем, сярод якіх назваў неабходнасць мадэрнізацыі вытворчасці. На яго думку, патрабуецца скразны падыход да мадэрнізацыі.

"Так, для буйных прадпрыемстваў неабходна не толькі кропкавае аснашчэнне асобнымі кампанентамі і вузламі, сістэмамі электроннага кіравання, але і складанне доўгатэрміновых, на некалькі гадоў, планаў мадэрнізацыі, уключаючы навукова-тэхнічны аўдыт. У недалёкай перспектыве мы павінны пераходзіць на высокааснашчаных прадпрыемствах да бязлюднай вытворчасці (поўнасцю аўтаматызаванай.). Праўда, аб гэтым пакуль мы гаворым вельмі нясмела", - падкрэсліў Уладзімір Гусакоў.

Ён таксама сказаў аб важнасці выкарыстання лічбавых тэхналогій сучаснымі сістэмамі кіравання.

"Сёння практычна на ўсіх машынабудаўнічых прадпрыемствах асвойваюцца лічбавыя тэхналогіі праектавання вырабаў машынабудавання. Гэта дызайн, разлікі, канструяванне, віртуальныя выпрабаванні. Распрацоўваюцца свае праграмы і ўзмацняюцца КБ, але для пераходу на завершаную сістэму лічбавай вытворчасці неабходна стварэнне поўных лічбавых двайнікоў машын і вытворчых ліній. Без гэтага нам не абысціся", - упэўнены старшыня Прэзідыума НАН.

Акрамя таго, ён падкрэсліў: "Практычна на ўсіх прадпрыемствах машынабудавання адзначаецца высокі ўзровень затрат на вытворчасць, у тым ліку значнай залежнасці ад імпарту сыравіны і камплектуючых. Для пераадолення гэтага акцэнт павінен быць зроблены на павышэнні ўзроўню лакалізацыі, вытворчасці, зніжэнні залежнасці ад замежных пастаўшчыкоў".

Уладзімір Гусакоў таксама лічыць, што вырашэнне многіх пытанняў - у развіцці галіновай навукі.

"Мы развіваем узаемадзеянне з усімі вядучымі прадпрыемствамі прамысловасці. І гэта практыка мае свае вынікі", - сказаў ён.

Старшыня Прэзідыума НАН таксама закрануў тэму мадэрнізацыі выпуску кампанентаў машынабудавання і крытычнага імпарту, якая, на яго думку, стрымліваецца недастатковай станочнай базай, асабліва з лічбавым кіраваннем.

Вырашэнне гэтай задачы ён бачыць у стварэнні або набыцці сучаснай станочнай базы з кіруючай электронікай і рабатызацыяй тэхналагічных ліній, а таксама ў імпартазамяшчэнні рэжучага інструмента, у тым ліку цвёрдасплаўнага.

Уладзімір Гусакоў асобна засяродзіў увагу на важнай тэме другаснага выкарыстання каштоўных адходаў вытворчасці як складніка эфектыўнага выкарыстання рэсурсаў.

"Такія тэхналогіі сёння ў паскораным рэжыме адпрацоўваюцца ў НАН", - заўважыў ён.

Асобна старшыня Прэзідыума закрануў тэму ўмацавання і абароны ад карозій паверхняў, у тым ліку металічных, і назваў рашэнне.

"Рашэннем можа з`яўляцца нанясенне сучасных ахоўных пакрыццяў, у тым ліку прымяненне тэхналогій цынкавання, цэментавання, аксідзіравання, нанясення найноўшых палімерных і іншых пакрыццяў", - расказаў ён і паведаміў, што ў сувязі з гэтым актыўна працуюць навуковыя арганізацыі НАН.

Уладзімір Гусакоў рэзюмаваў: "Усё сказанае будзе неэфектыўным, калі не выконваць тэхналагічнай дысцыпліны. Час пераходзіць не толькі на спецыяльныя тэхналагічныя рэжымы, а на тэхналагічныя стандарты, якія робяць тэхналагічныя працэсы строга рэгламентаванымі".

Пры гэтым ён выказаў меркаванне, што прамысловы комплекс краіны апошнія гады набыў дастатковую ўстойлівасць развіцця.

9 красавіка 2024, Мінск
БЕЛТА