Каментуючы падрабязнасці дамоўленасцей па фармаванні кошту расійскага газу для Беларусі, Аляксей Аўдонін прааналізаваў эфект прынятага рашэння на беларускую эканоміку. Ён таксама згадаў заходнюю пазіцыю па пытаннях узаемадзеяння Беларусі і Расіі ў энергетычнай сферы.

"Трэба вярнуцца літаральна на два гады таму. Заходнія краіны тады публікавалі даволі шмат аналітычных артыкулаў, дзе адзначалі, што ні ў якім разе Захаду нельга дапусціць энергетычнага саюза паміж Беларуссю і Расіяй. Таму што, калі будуць прысутнічаць рознагалоссі паміж гэтымі дзвюма краінамі, іх лягчэй потым раздзяліць па палітычных, ідэалагічных матывах і зрабіць нешта накшталт Украіны", - нагадаў Аляксей Аўдонін.

Цяпер, на думку аналітыка, для Беларусі развіццё супрацоўніцтва з Расіяй у галіне энергетыкі, падпісанне адпаведных пагадненняў, пераход на дакладныя алгарытмы фармавання цаны на газ і разлікі ў расійскіх рублях сведчаць выключна аб перамозе над Захадам.

"Гэта вялікая перамога над сіламі Захаду. Яны хацелі нас раз`яднаць энергетычна, а цяпер не змогуць гэтага зрабіць. А значыць, не могуць падарваць нашу эканоміку", - падкрэсліў аналітык.

Эксперт таксама супаставіў плацяжы за газ еўрапейскіх краін, якія ўвялі санкцыі і спрабуюць дайсці да эмбарга на энерганосьбіты, і Беларусі.

"Такія цана і ўмовы, што ёсць у Беларусі, будуць садзейнічаць высокім тэмпам росту нашай эканомікі. Мы будзем паказваць больш высокі вынік, чым нават самыя буйныя краіны Еўропы. І гэта, безумоўна, не ўкладваецца ў тую карціну свету, якую Захад хацеў нам навязаць. Нам хацелі зрабіць беднасць, эканамічны спад і энергетычны калапс. Але гэтага не адбылося. Дзякуй кіраўніцтву нашай краіны, што празорліва ўбачыла тыя пагрозы, якія маглі нас чакаць у выпадку, калі б мы пайшлі на повадзе ў краін Захаду", - рэзюмаваў эксперт.

20 красавіка 2022, Мінск
БЕЛТА