Азія — рынак, які хутка пашыраецца, для паставак беларускай прадукцыі і перспектыўная крыніца інвестыцый у нашу эканоміку. 

«Азіяцкі рэгіён уяўляе сабой безумоўны прыярытэт для Беларусі: і як ёмісты, перспектыўны рынак, які хутка пашыраецца, для беларускіх тавараў і паслуг, і як перспектыўная крыніца інвестыцый у нашу эканоміку. Традыцыйна ключавым напрамкам знешнепалітычнай і знешнеэканамічнай дзейнасці Беларусі ў Азіі з’яўляецца паглыбленне ўсебаковага стратэгічнага партнёрства з Кітаем. Кітай ужо не першы год захоўвае другое месца сярод звыш сотні краін-імпарцёраў беларускіх тавараў з доляй прыкладна 7 працэнтаў і добрымі перадумовамі да яе далейшага росту», — сказала Юлія Абуховіч.

Візіты Прэзідэнта Беларусі і прэм’ер-міністра, якія адбыліся ў канцы мінулага года, у час якіх кіраўнік дзяржавы наведаў ААЭ, Кітай і шэраг афрыканскіх краін, а кіраўнік урада — Узбекістан і В’етнам, абазначылі прыярытэтныя напрамкі знешняй палітыкі дадаткова да паглыблення інтэграцыі з краінамі ЕАЭС.

«Несумненна, з гэтага года яшчэ больш будзе расці актыўнасць беларускіх дыпламатаў і экспарцёраў у рабоце з краінамі-членамі ШАС. Павінны атрымаць развіццё і традыцыйна добрыя адносіны з ААЭ і Турцыяй», — лічыць экспертка.

«Існуе мноства агульных інтарэсаў з азіяцкімі краінамі, хоць не ўсе з іх імпартуюць прадукцыю, аналагічную выпускаемай у Беларусі, а асобныя краіны з’яўляюцца нашымі канкурэнтамі: напрыклад, Бангладэш, Індыя і Пакістан. У сувязі з гэтым цікава адзначыць сяміразовы рост экспарту прадукцыі лёгкай прамысловасці Беларусі ў бягучым годзе ва Узбекістан — краіну, якая знакаміта сваімі швейнымі вырабамі і раней успрымалася выключна ў якасці канкурэнта ў гэтай галіне. Поспех забяспечыла прымяненне больш прагрэсіўных форм эканамічнага ўзаемадзеяння — прамысловай кааперацыі і аўтсорсінгу», — звярнула ўвагу Юлія Абуховіч.

Звязда, 27 ліпеня 2024