Беларусь і Турцыя маюць намер выкарыстоўваць свой статус дзяржаў-партнёраў БРІКС у мэтах развіцця трансгранічнага біржавога гандлю ў двухбаковым і шматбаковым фарматах. Аб гэтым дамовіліся першы намеснік старшыні праўлення Беларускай універсальнай таварнай біржы Вольга Гарэлік і прэзідэнт Стамбульскай таварнай біржы (İstanbul Ticaret Borsası, İSTİB) Алі Копуз.

Сустрэча прадстаўнікоў дзвюх бірж адбылася ў штаб-кватэры İSTİB у Стамбуле напярэдадні афіцыйнага адкрыцця Міжнароднай шматгаліновай выстаўкі MUSIAD EXPO, у якой БУТБ прымае ўдзел у якасці экспанента. У час перагавораў Алі Копуз падкрэсліў, што высокі ўзровень дыпламатычнага і гандлёва-эканамічнага дыялогу Беларусі і Турцыі неабходна спраецыраваць на біржавую сферу, дзе ёсць шырокія магчымасці для плённага ўзаемадзеяння ў інтарэсах абодвух бакоў.

"Упэўнены, што нядаўняе ўступленне Беларусі ў БРІКС у якасці дзяржавы-партнёра будзе садзейнічаць умацаванню дзелавых кантактаў як з асобнымі краінамі, так і ў рамках аб`яднання ў цэлым, што надасць новы імпульс міжбіржавому супрацоўніцтву. У святле гэтага мы пацвярджаем зацікаўленасць у сумеснай рабоце з БУТБ па ўсіх актуальных аспектах двухбаковага і шматбаковага парадку дня", - заявіў кіраўнік турэцкай біржы.

Вольга Гарэлік выказала ўдзячнасць турэцкаму калегу за гатоўнасць актывізаваць узаемадзеянне, адзначыўшы, што па выніках 10 месяцаў 2024 года Турцыя ўвайшла ў першую дзясятку краін па суме здзелак на беларускай біржавой пляцоўцы.

"За студзень-кастрычнік бягучага года біржавы тавараабарот турэцкіх кампаній перасягнуў адзнаку $17 млн. Гэта ў 2,5 раза больш, чым за аналагічны перыяд 2023 года, а драйверам росту стала не адзін, а адразу некалькі таварных напрамкаў. Так, у Турцыю пастаўляліся беларускія піламатэрыялы, цукар, пшанічны глютэн, сухое малако, лом чорных металаў і льняное валакно, а па імпарце закуплялася поліэфірная пража і ніткі, запатрабаваныя ў тэкстыльнай прамысловасці Беларусі. Не сумняваюся, што пры падтрымцы Стамбульскай таварнай біржы мы зможам дапоўніць гэты пералік новымі перспектыўнымі пазіцыямі - у першую чаргу ў сегменце АПК", - заявіла Вольга Гарэлік.

ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. Беларуская ўніверсальная таварная біржа - адна з буйнейшых таварных бірж ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.

Па стане на 1 лістапада 2024 года на БУТБ былі акрэдытаваны 102 рэзідэнты Турцыі. З пачатку года іх колькасць павялічылася ў 1,5 раза.

26 лістапада 2024, Мінск
БЕЛТА