Расійская кампанія "Транснафта" выплаціла ўкраінскаму аператару магістральных нафтаправодаў кампаніі "Укртранснафта" частковую кампенсацыю за пастаўкі няякаснай нафты на ўкраінскі ўчастак нафтаправода "Дружба".

"Укртранснафта" атрымала ад "Транснафты" частку кампенсацыі ў памеры больш як 2,3 млн еўра за пападанне нафты з павышанай колькасцю хлорарганічных злучэнняў ва ўкраінскі ўчастак нафтаправода "Дружба", - сказана ў паведамленні.

Выплата кампенсацыі дала магчымасць пакрыць недаатрыманы даход кампаніі, выкліканы часовым спыненнем транзіту нафты ў красавіку бягучага года, паведаміла "Укртранснафта".

Памер кампенсацыі быў вызначаны дадатковым пагадненнем да дзеючага пагаднення аб транзіце нафты, дадалі ва ўкраінскай кампаніі. З-за пападання няякаснай нафты ў нафтаправод "Дружба" транзіт нафты па ўкраінскім участку прыпыняўся з 25 красавіка па 11 мая гэтага года.

Акрамя таго, транзіт прыпыняўся з 17 мая па 21 мая ў сувязі з неабходнасцю даць еўрапейскім контрагентам дадатковы час на падрыхтоўчыя мерапрыемствы, сказана ў паведамленні.

Як паведамлялася, "Белнафтахім" 19 красавіка заявіў аб рэзкім пагаршэнні якасці расійскай нафты Urals, якая паступала па трубаправодзе "Дружба".

У выніку шэраг краін перасталі прымаць і перапрацоўваць расійскую нафту.

31 ліпеня 2019, Кіеў
БЕЛТА - ТАСС