Гандлёвы цэнтр такога фармату, у якім прадстаўлена прадукцыя айчынных вытворцаў з кожнага рэгіёну краіны, адкрываецца ўпершыню. Гандлёвая прастора прадстаўлена фірмовымі магазінамі і аб’ектамі грамадскага харчавання вядучых беларускіх вытворцаў.

Плануецца, што наведванне гандлёвага цэнтра будзе ўключана ў турыстычныя маршруты па Мінску, каб госці сталіцы змаглі азнаёміцца з прадукцыяй айчынных вытворцаў і набыць яе ў адным месцы.

У ліпені 2022 года падчас наведвання гандлёвага цэнтра «Сталіца» Аляксандр Лукашэнка даручыў стварыць беларускі гандлёвы цэнтр на месцы даўгабуда на скрыжаванні праспекта Незалежнасці і вуліцы Кірыла Тураўскага ў Мінску. Раней гэты аб’ект называўся «Магніт Мінска». Яго пачалі будаваць яшчэ ў 2009 годзе, але на момант сярэдзіны 2022 года работы так і не былі завершаны. Кіраўнік дзяржавы тады даручыў аператыўна пачаць працаваць на месцы даўгабуда.

«Беларускае, беларускае і беларускае. Нас ніхто не папракне з іншаземцаў. Пайшлі — ідзіце. Мы будзем прадаваць сваё, — гаварыў Аляксандр Лукашэнка аб галоўным сэнсавым напаўненні пры стварэнні гандлёвага цэнтра. — Трэба выбудоўваць палітыку так, каб прыярытэт быў беларускаму».

Акрамя прысутнасці вядучых беларускіх брэндаў перавагай гандлёвага дома з’яўляецца наяўнасць у ім шматфункцыянальнага цэнтра для ажыццяўлення адміністрацыйных працэдур, які ўключае службу «адно акно» і разлікова-даведачны цэнтр адміністрацыі Першамайскага раёна горада Мінска, філіял РУП «Мінскае гарадское агенцтва па дзяржаўнай рэгістрацыі і зямельным кадастры», аддзел па грамадзянстве і міграцыі галоўнага ўпраўлення ўнутраных спраў Мінскага гарвыканкама.

Плошча гандлёвых памяшканняў тут складае больш як 21 тыс. кв. м, колькасць аб’ектаў гандлю, бытавых паслуг і грамадскага харчавання — 133.

Звязда, 29 снежня 2023