Дзяржаўная праграма развіцця электрапрывадной тэхнікі з рознымі крыніцамі энергіі будзе распрацавана ў Беларусі.  

"У бліжэйшы час будзе распрацавана комплексная праграма. Яна будзе абмеркавана ва ўрадзе - дзяржаўная праграма развіцця электрапрывадной тэхнікі з рознымі крыніцамі энергіі", - заявіў міністр.

Ён падкрэсліў, што развіццё электрамабіляў і электратранспарту ў цэлым сёння вельмі актуальна ў свеце, і Беларусі важна не адстаць у гэтым пытанні. Пры гэтым ён заўважыў, што электрапрывод у краіне выкарыстоўваецца ўжо даўно, у тым ліку ў будове тралейбусаў, электробусаў, адпаведныя тэхналогіі ёсць і ў аўтамабілях БелАЗ.

"У Беларусі сёння больш за 3 млн транспартных сродкаў. Калі мы зможам прапанаваць рынку канкурэнтаздольны электрамабіль, то яго будуць купляць. Трэба зрабіць так, каб беларускі спажывец прагаласаваў рублём за гэту прадукцыю. Самае важнае - стварыць інфраструктуру - заправачныя станцыі", - адзначыў Віталь Воўк.

Як адзначаюць эксперты, у перспектыве па меры ўкаранення тэхнічных навацый і зніжэння кошту электрамабіляў пры адначасовым павышэнні іх тэхнічных характарыстык перасесці з прывычных аўто на электракары прымусіць элементарная выгада.

Так, ужо цяпер кошт паездкі на электрамабілі ў 2-3 разы меншы, чым на машыне з рухавіком унутранага згарання на бензіне. Акрамя таго, значная эканомія дасягаецца ў пытанні тэхнічнага абслугоўвання.

31 жніўня 2017, Мінск
Уладзімір Мацвееў - БЕЛТА