Аб’ём продажу грузавых і спецыяльных аўтамабіляў МАЗ у Расіі ў студзені-лістападзе склаў 5 845 машын, паведамляецца ў справаздачы аналітычнай кампаніі "Автосельхозмаш-холдинг".

Кожны месяц на расійскім рынку прадаецца 500-600 грузавікоў ці спецмашын МАЗ. Па гэтым паказчыку беларускі вытворца блізкі да расійскага ГАЗа, але той апярэджвае яго на некалькі соцень прададзеных аўто.

Першы радок заняў КамАЗ: з пачатку года прададзена амаль 29 тыс грузавікоў. Далей ідуць кітайскія вытворцы SITRAK, SHAANXI, FAW і HOWO. Ва ўсіх кампаній з КНР вялікі рост. Напрыклад, у SITRAK, калі параўнаць 11 месяцаў гэтага года і мінулага, продаж павялічыўся больш чым у восем разоў.

Найбольшым попытам у Расіі, мяркуючы па статыстыцы лістапада, карыстаюцца не класічныя грузавікі або самазвалы, а седлавыя цягачы. У іх найбольшая доля продажу ў цэлым па сегменце. Калі агульная колькасць прададзеных за месяц машын буйных класаў склала больш за 12,3 тыс штук, то цягачоў – 4,2 тыс, гэта значыць прыкладна трэць усяго аб’ёму.

Пры гэтым заходнія брэнды працягваюць страчваць рынак. Да прыкладу, за 11 месяцаў мінулага года кампанія Volvo прадала ў Расіі звыш 1,5 тыс машын, а за такі ж перыяд бягучага года 933. З гэтай тэндэнцыі сярод заходніх вытворцаў выбіваецца Mercedes. У студзені-лістападзе 2022 года было рэалізавана 1 086 машын, а цяпер – 1 628 (рост амаль 50%).

Асобная статыстыка даецца па МАЗ-MAN, і тут продаж малаважны. З пачатку года ў Расіі рэалізавана ўсяго толькі 74 машыны, тры з якіх у лістападзе.

Самая папулярная мадэль беларускіх грузавікоў у Расіі – гэта МАЗ 6501 (6х4).

У гэтым сегменце МАЗ займае шостае месца па продажу – 799 аўтобусаў са студзеня па лістапад. Першая пазіцыя ў ПАЗа – 5 589 машын, затым ідуць YUTONG (1 885), ЛіАЗ (1 566), НефАЗ (1 545) і "Волжанин" (1 125). Найбольш хадавыя мадэлі беларускіх аўтобусаў – гэта нізкападлогавыя МАЗ-206 і МАЗ-226.

Самы хадавы брэнд легкавых аўто – LADA. У студзені-лістападзе набыта амаль 295 тыс штук. На другім месцы CHERY – больш за 106 тыс машын. Далей ідзе HAVAL – каля 97 тыс, а GEELY прададзена амаль 80,6 тыс, што на 176% больш аб’ёмаў за 11 месяцаў 2022 года.

На першым месца па папулярнасці сярод легкавікоў – LADA Granta. Таксама ахвотна бяруць GEELY COOLRAY (Belgee X50), які знаходзіцца на сёмым месцы.