Арбітражны суд Масквы пастанавіў спагнаць з СЗАТ "Асіповіцкі вагонабудаўнічы завод" (АВЗ) больш за 2,5 млн долараў ЗША на карысць Еўразійскага банка развіцця (ЕАБР).

У красавіку 2011 года банк склаў крэдытную дамову з АВЗ на 63,519 млн долараў ЗША тэрмінам на 8 гадоў у межах праекта "Арганізацыя сучаснай высокатэхналагічнай вытворчасці грузавых чыгуначных вагонаў і танк-кантэйнераў у горадзе Асіповічы".

Аднак, як адзначае ЕАБР, са жніўня 2015 года пазычальнікам быў дапушчаны шэраг пратэрміновак па выплаце сумы асноўнага доўгу і працэнтаў, налічаных у адпаведнасці з крэдытнай дамовай.

"З мэтай абароны правоў ЕАБР і інтарэсаў яго акцыянераў банк быў вымушаны звярнуцца ў суд з адпаведнай іскавай заявай. Па выніках разгляду іскавай заявы Арбітражны суд горада Масквы цалкам задаволіў патрабаванні ЕАБР аб спагнанні пратэрмінаванай запазычанасці на агульную суму больш за 2,5 млн долараў ЗША", — гаворыцца ў паведамленні.

Еўразійскі банк развіцця з`яўляецца міжнароднай фінансавай арганізацыяй, заснаванай Расіяй і Казахстанам у студзені 2006 года з мэтай садзейнічання развіццю рыначнай эканомікі дзяржаў-удзельніц, іх устойліваму эканамічнаму росту і пашырэнню ўзаемных гандлёва-эканамічных сувязяў.

Статутны капітал ЕАБР складае 7 млрд долараў. Дзяржавамі — удзельнікамі банка з`яўляюцца Арменія, Беларусь, Казахстан, Кыргызстан, Расія і Таджыкістан.

Інвестыцыйны дагавор аб будаўніцтве завода па выпуску чыгуначных вагонаў і танк-кантэйнераў на базе Асіповіцкага вагоннага дэпо, дзе да гэтага вагоны толькі рамантаваліся, быў падпісаны ў 2008 годзе паміж урадам Беларусі і расійскім ЗАТ "Гранд Экспрэс".

Для рэалізацыі праекта было створана сумеснае ЗАТ "Асіповіцкі вагонабудаўнічы завод", дзе 74% належалі расійскай кампаніі, а 26% — Беларускай чыгунцы.

Праектная магутнасць Асіповіцкага завода пасля рэалізацыі праекта коштам 160 млн долараў павінна была дасягнуць 2,5 тысячы грузавых вагонаў і 2 тысячы танк-кантэйнераў у год. Інавацыйныя тэхналогіі, якія выкарыстоўваюцца ў вытворчасці, павінны былі дазволіць хутка пераходзіць ад выпуску адной мадэлі вагонаў да іншай.

Еўразійскі банк развіцця падключыўся да фінансавання праекта ў красавіку 2011 года, выдзеліўшы сумеснаму прадпрыемству на 8 гадоў крэдытную лінію ў памеры 63 млн 519 тыс. долараў пад гарантыю ўрада Беларусі.

У канцы лістапада 2016 года стала вядома, што Асіповіцкі вагонабудаўнічы завод накіраваў у эканамічны суд Магілёўскай вобласці заяву аб прызнанні прадпрыемствы эканамічна неплацежаздольным (банкрутам). Інфармацыя пра гэта размешчаная ў Адзіным дзяржаўным рэестры звестак аб банкруцтве.

Аляксей Арэшка, БелаПАН
Мінск, 6 снежня 2016