У Беларусі за студзень-верасень бягучага года асвоена 112 лекавых сродкаў, якія раней не вырабляліся на тэрыторыі краіны.

За 2011-2014 гады распрацавана і выведзена на рынак 446 найменняў лекавых сродкаў беларускай вытворчасці - як генерыкаў, так і арыгінальных. У 2015 годзе плануецца, што гэта лічба будзе складаць не менш як 140 прэпаратаў.

"За 9 месяцаў мы ўжо асвоілі 112 найменняў лекавых сродкаў. Па большай частцы гэта генерычныя лекавыя прэпараты", - сказаў Віктар Шэін.

Паводле яго слоў, у першую чаргу ідзе асваенне тых лякарстваў, якія займаюць вялікую долю імпарту ($1-2 млн па адным найменні), а таксама востра запатрабаваны ў практыцы аказання медыцынскай дапамогі ў стацыянарах. Усяго ў Беларусі на гэты момант зарэгістравана каля 5 тыс. лякарстваў, 1,5 тыс. з якіх беларускай вытворчасці. 82 найменні ўяўляюць сабой арыгінальныя айчынныя лекавыя сродкі.

Уся астатняя наменклатура - гэта генерычныя лякарствы, якія па сваім саставе і эфектыўнасці нічым не ўступаюць імпартным аналагам. Пры гэтым асобныя прэпараты ў 2-4 разы таннейшыя за імпартныя аналагі. Больш за 70 працэнтаў прадукцыі, што адпускаецца на ўнутраны рынак, мае дыяпазон цэнавага прапанавання да $1.

14 кастрычніка 2015, Мінск
БЕЛТА