Намеснік міністра замежных спраў Беларусі Аляксандр Гур`янаў адзначае дадатную дынаміку паставак айчыннай прамысловай прадукцыі ў краіны далёкага замежжа. 

29 ліпеня члены Прэзідыума разгледзелі пытанне аб прынятых дзяржаўнымі органамі і арганізацыямі мерах па нарошчванні і дыверсіфікацыі экспарту тавараў і паслуг за студзень-май бягучага года і выніках работы службовых асоб, замацаваных за замежнымі краінамі.

Паводле слоў намесніка міністра, нягледзячы на няпростую сітуацыю на рынках краін СНД, сёння назіраецца рост паставак на іх айчыннай прамысловай прадукцыі. Акрамя таго, павялічыўся экспарт прампрадукцыі ў краіны Афрыкі. "Дадатная дынаміка таксама адзначаецца ў 22 краінах далёкага замежжа, у тым ліку ў Балгарыі, Латвіі, Афганістане і інш", - канстатаваў Аляксандр Гур`янаў.

Ён таксама адзначыў намаганні, якія прыкладаюцца па пашырэнні геаграфіі паставак фармацэўтычнай прадукцыі, што стала магчымым дзякуючы актыўнаму асваенню рынкаў Манголіі, В`етнама, Грузіі, а таксама праводзімай рабоце па рэгістрацыі айчынных прэпаратаў у краінах Афрыкі і Азіі.

У цэлым жа па выніках мінулага перыяду бягучага года не ўсе прагнозныя паказчыкі па экспарце выкананы. Пры гэтым з экспартам паслуг сітуацыя крыху лепшая, чым па таварах.

У той жа час па выніках студзеня-мая адзначаецца скарачэнне імпарту тавараў і паслуг, што, паводле слоў Аляксандра Гур`янава, абумоўлена не толькі эканамічнымі фактарамі, але і правядзеннем канкрэтных мерапрыемстваў на ўнутраным рынку рэспублікі.

Намеснік міністра падкрэсліў: "Сітуацыя на рынках у многім залежыць не ад нас, таму мы павінны падстройвацца пад існуючыя ўмовы". "Узрушэнні на фінансавых рынках, абмежавальныя меры, якія ўводзіліся або ўводзяцца, уплываюць у тым ліку на знешні гандаль Рэспублікі Беларусь, - адзначыў Аляксандр Гур`янаў. - У сувязі з гэтым нашай краінай быў прыняты шэраг рашэнняў. У тым ліку, прыкметна актывізавана работа па дыверсіфікацыі экспарту па лініі нашых экспарцёраў".

Нягледзячы на тое, што пакуль лічбы экспарту не ўдаецца аднавіць у поўным аб`ёме, пэўныя пазітыўныя вынікі ўсё ж ёсць, канстатаваў намеснік міністра. "Мы працуем ва ўмовах дадатнага гандлёвага сальда, адзначаем, што крыху выпраўляецца сітуацыя са знешняй дэбіторскай запазычанасцю, па шэрагу галін ёсць пазітыўныя рухі па асваенні новых рынкаў", - дадаў ён.

29 ліпеня 2015, Мінск
Таццяна Лісатовіч - БЕЛТА