У радзе выпускаемай на прадпрыемстве тэхнікі Прэзідэнту прадставілі трактар, які працуе на газаматорным паліве. Як было даложана, выкарыстанне гэтага віду паліва дае магчымасць істотна сэканоміць на эксплуатацыі, а перавод нават 10 працэнтаў камунальнай тэхнікі і транспарту на газ дазволіць эканоміць дзясяткі мільёнаў долараў. У Мінску ўжо эксплуатуюцца пробныя партыі такой тэхнікі. "Давайце паскорым. Гэта рэальная эканомія. Нам трэба хутчэй ісці там, дзе ёсць эканомія, і мы ўмеем гэта рабіць", - заявіў кіраўнік дзяржавы.

У канцы 2014 года "Газпрам газаматорнае паліва" і "Газпрам трансгаз Беларусь" падпісалі дарожную карту па развіцці рынку газаматорнага паліва Беларусі. Гэты праект накіраваны на развіццё вытворча-збытавой інфраструктуры кампрыміраванага і звадкаванага прыроднага газу, комплекснае развіццё рынку газаматорнага паліва на тэрыторыі Беларусі, а таксама стварэнне міжнародных калідораў для транспарту, які выкарыстоўвае прыродны газ у якасці маторнага паліва.

План мерапрыемстваў дарожнай карты таксама прадугледжвае актыўнае ўзаемадзеянне з органамі ўлады па ўвядзенні стымулюючых механізмаў набыцця тэхнікі, якая працуе на прыродным газе, і супрацоўніцтва з заводамі - вытворцамі аўтатранспарту па развіцці вытворчасці газабалоннай тэхнікі. Такім чынам, будаўніцтва аб`ектаў газазаправачнай інфраструктуры будзе сінхранізавана з праграмамі набыцця газаматорнага транспарту. Пашырэнне выкарыстання прыроднага газу на транспарце будзе садзейнічаць росту энергетычнай і экалагічнай бяспекі рэспублікі, а таксама ўнясе значны ўклад у павышэнне канкурэнтаздольнасці эканомікі за кошт зніжэння паліўных выдаткаў.

15 траўня 2015, Мінск
БЕЛТА