Золатавалютныя рэзервы Беларусі выраслі за ліпень больш як на 55 млн долараў, паведамілі ва ўпраўленні інфармацыі і грамадскіх сувязей Нацбанка.

Па стане на 1 жніўня ЗВР склалі 7 млрд 561,7 млн ​​долараў – гэта папярэднія даныя рэгулятара. У параўнанні з мінулым месяцам, рэзервы выраслі на 55,5 млн долараў (ці на 0,7%). У чэрвені яны таксама паказалі рост на 96,6 млн, аднак у маі знізіліся на 351,5 млн.

Найбольшае падзенне ЗВР паказалі ў красавіку: пасля сакавіцкіх 8,3 млрд долараў рэзервы знізіліся да 7,6 млрд.

Нагадаем, раней беларускія ўлады прынялі перспектыўнае рашэнне, што аб’ём ЗВР на справаздачную дату 1 студзеня 2023 года не павінен быць ніжэйшы за 7 мільярдаў долараў. У канцы 2021-га золатавалютныя рэзервы, якія складаюцца з аб’ёму манетарнага золата, актываў у замежнай валюце, спецыяльных праў запазычання і іншых актываў, склалі каля 8,5 млрд долараў.

Запасы міжнародных рэзерваў Нацбанк звычайна павялічвае за кошт пакупкі валюты на біржы і яе паступленняў у бюджэт пасля буйных экспартных паставак.

Аднак акрамя даходаў ёсць і валютныя выдаткі: штомесяц урад Беларусі выплачвае тую ці іншую суму па знешніх і ўнутраных даўгах.

У прэс-службе Нацбанка звярнулі ўвагу, што, пачынаючы са жніўня 2022 года, інфармацыя аб аб’ёме ЗВР будзе публікавацца без дэталізацыі іх структуры. Таксама не будуць указвацца фактары, якія паўплывалі на змяненне аб’ёму рэзерваў.

Мінск, 6 жніўня 2022
Sputnik