«Учора мы атрымалі вельмі прыемныя весткі: мы выйгралі наступны тэндэр, у якім удзельнічалі, дзе былі нашы канкурэнты — і японцы, і амерыканцы. Мы паставім 96 цяжкіх кар’ерных самазвалаў класа 220 т», — распавёў Пётр Пархомчык.

Паводле яго слоў, пастаўка расцягнецца на два гады. Да канца 2020-га БЕЛАЗ адгрузіць у Індыю 12 машын, а ў 2021-м — астатнюю частку. Агульная сума кантракту перавышае $300 млн.

Цяпер Беларускі аўтамабільны завод завяршае выкананне папярэдняга буйнога кантракту з Індыяй. У краіну будзе пастаўлена 77 цяжкіх самазвалаў грузападымальнасцю 136 т, ужо адгружана 56 машын. Гэтую замову БЕЛАЗ выйграў у амерыканцаў — кампаніі Caterpillar.

Звязда, 27 жніўня 2020