Прадпрыемства "Беларуськалій" пасля развалу Савецкага Саюза знаходзілася на мяжы выжывання, але Прэзідэнт Беларусі прыняў рашэнне, што гэта прадпрыемства мы нікому не аддадзім. Аб гэтым на канцэрце "Час выбраў нас" у час "Марафону адзінства" ў Салігорску заявіла старшыня Савета Рэспублікі Наталля Качанава. 

"Я вельмі рада сёння быць тут, на гэтым "Марафоне адзінства". І сімвалічна, што ў першыя дні новага года марафон праходзіць менавіта тут, у маладым горадзе Салігорску. Я вельмі рада перадаць вам словы прывітання і добрыя пажаданні ад нашага Прэзідэнта, паважанага Аляксандра Рыгоравіча Лукашэнкі. Гэты марафон - падарунак беларускаму народу ад нашага кіраўніка дзяржавы", - сказала Наталля Качанава.

Старшыня Савета Рэспублікі адзначыла, што Салігорск - малады горад са слаўнай гісторыяй. "Сюды ў далёкім 1958 годзе прыехалі маладыя людзі з усяго Савецкага Саюза на ўсесаюзную ўдарную камсамольскую будоўлю, каб на адкрытым геолагамі радовішчы пабудаваць горад і камбінат. Вядома, сваім нараджэннем горад абавязаны калійнаму камбінату, у гэтым няма ніякага сумнення. Мабыць, у кожнага беларуса Салігорск асацыюецца з "Беларуськаліем", - падкрэсліла Наталля Качанава.

Старшыня Савета Рэспублікі звярнула ўвагу, што "Беларуськалій" - гэта больш за 15 тыс. людзей, якія працуюць на галаўным прадпрыемстве ў Салігорску, гэта амаль 20 працэнтаў сусветнага рынку ўгнаенняў, гэта 300 км падземных тунэляў і 140 краін, у якія пастаўляецца прадукцыя прадпрыемства. 

"Але так было не заўсёды. Былі цяжкія часы, і пасля развалу Савецкага Саюза прадпрыемства знаходзілася на мяжы выжывання. Было нямала тых, хто хацеў прыватызаваць, выкупіць за бясцэнак гэта народнае багацце. Прэзідэнт цвёрда сказаў: не, свае прадпрыемствы мы нікому не аддадзім", - канстатавала Наталля Качанава.

Яна таксама звярнула ўвагу, што зусім нядаўна на тэлеэкранах паказалі марш шахцёраў у Мінск у 90-я гады. "Шахцёры рабілі гэта ад бязвыхаднасці. Таму што не выплачвалася заработная плата, не было дзяржаўнай падтрымкі, і прадпрыемства знаходзілася ў такім стане. І тады Прэзідэнт прыняў рашэнне: дзяржаўнай падтрымцы быць! Ён падтрымаў усе інвестпраекты, якія рэалізоўваліся на гэтым прадпрыемстве. І прадпрыемства пачало сур`ёзна працаваць, умацоўваючы эканоміку не толькі Салігорска і Мінскай вобласці, але ў цэлым эканоміку нашай краіны", - падкрэсліла старшыня Савета Рэспублікі.

Наталля Качанава адзначыла: Салігорск называюць багатым горадам, дзе ў людзей высокія зарплаты. "Але зусім нядаўна на нарадзе з навукоўцамі Прэзідэнт выразна сказаў: зарплата ў шахцёраў заробленая, кожны рубель паліты потам. Шахцёрам плацяць за рэзультат, у нашай краіне людзям плацяць за рэзультат", - рэзюмавала старшыня Савета Рэспублікі.

4 студзеня 2025, Салігорск
БЕЛТА