Прэзідэнт коратка нагадаў аб пачатковым этапе станаўлення Рэспублікі Беларусь, адзначыўшы, што кожны памятае "і развал 1990-х гадоў, і будаўніцтва новай краіны". "Мы з вамі творцы і прамыя ўдзельнікі гэтага вялікага гістарычнага працэсу", — заявіў Лукашэнка.

Вынікам развалу СССР, паводле яго слоў, стала тое, што "назапашвання грамадзян былі абясцэненыя, старыя ідэалы разбураныя, масавая беднасць стала ўспрымацца як норма". "Усё гэта праходзіла на фоне цяжкага эканамічнага спаду, нестабільных фінансаў, паралічу сацыяльнай сферы. У тыя гады народу Беларусі трэба было адначасова адстаяць суверэнітэт і абсалютна дакладна вызначыць новы курс будаўніцтва эканомікі і грамадства", — сказаў кіраўнік дзяржавы.

У першыя гады незалежнасці, паводле слоў Лукашэнкі, выпуск некаторых відаў прадукцыі "або наогул спыніўся, або скараціўся ў 5-10 разоў", акрамя таго, "у значнай меры былі страчаныя навукова-тэхнічныя пазіцыі, адбыўся адток кваліфікаваных кадраў". У цэлым менавіта Беларусь "як вытворца канчатковай прадукцыі найбольш востра адчула наступствы разбурэння адзінага народна-гаспадарчага комплексу".

"Ствараліся перадумовы, каб Беларусь апынулася пад знешнім кіраваннем. Былі спробы расцягнуць смачныя кавалкі дзяржуласнасці, а народ пакінуць жабраком. На шчасце, у нашай краіне гэтага не адбылося. Мы выбралі свой шлях — не шокавай тэрапіі, а эвалюцыйнага развіцця", — падкрэсліў Лукашэнка.

Захар Шчарбакоў, БелаПАН
Мінск, 22 чэрвеня 2016