Пералік інвестыцыйных праектаў, замацаваных за членамі ўрада, кіраўнікамі аблвыканкамаў і Мінскага гарвыканкама, а таксама дзяржаўных арганізацый, падпарадкаваных ураду, зацверджаны ў новай рэдакцыі. 

Дакумент уносіць змены і дапаўненні ў пастанову Савета міністраў ад 11 верасня 2012 года № 841.

Як паведамляе прэс-служба ўрада, пералік абноўлены ў сувязі з кадравымі зменамі, завяршэннем асобных інвестыцыйных праектаў, скасаваннем інвестыцыйных дагавораў, удакладненнем найменняў праектаў і арганізацый, а таксама тэрмінаў іх рэалізацыі.

Усяго ў пералік уключана 55 інвестпраектаў.

У прыватнасці, прэм`ер-міністр Андрэй Кабякоў будзе курыраваць праект па стварэнні вытворчасці па зборцы легкавых аўтамабіляў, які рэалізуецца СЗАТ "Белджы".

Першы намеснік прэм`ер-міністра Васіль Мацюшэўскі ўзяў пад асабісты кантроль праект ЗВГУП "Рэб-Фарма" па рэканструкцыі вытворчасці пад выпуск фармацэўтычнай прадукцыі ў гарадскім пасёлку Смілавічы Чэрвеньскага раёна.

Уладзімір Сямашка працягне курыраваць будаўніцтва атамнай электрастанцыі.

За намеснікам прэм`ер-міністра Анатолем Калініным замацаваны праект па комплексным развіцці Аршанскага авіярамонтнага завода, у тым ліку мадэрнізацыі і павелічэнні загрузкі яго вытворчых магутнасцяў.

Віцэ-прэм`ер Міхаіл Русы адказны за стварэнне вертыкальна-інтэграванага комплексу па прамысловай вытворчасці прадукцыі з мяса індычкі на тэрыторыі Лідскага раёна Гродзенскай вобласці.

Пад кантролем намесніка прэм`ер-міністра Наталлі Качанавай будзе ажыццяўляцца мадэрнізацыя рэактарнага блока і вузла ачысткі рэгенераванага бензіну цэха № 3 па вытворчасці сульфанатных прысадак на СТАА "ЛЛК-Нафтан".

Буйныя інвестпраекты замацаваныя за кожным міністрам, губернатарамі і старшынёй Мінскага гарвыканкама, кіраўнікамі дзяржаўных камітэтаў і канцэрнаў, паведамляе прэс-служба.

Большасць праектаў, уключаных у пералік, прадугледжвае прыцягненне прамых замежных інвестыцый.

Андрэй Серада, БелаПАН
Мінск, 10 чэрвеня 2016