Кіраўнік ОПЕК Абдала Салем аль-Бадры заявіў перад пачаткам пасяджэння 169-й сесіі ОПЕК у Вене, што дрэнны перыяд на рынку нафты ўжо ў мінулым, ён прагназуе паляпшэнне цэнавай дынамікі.

Паводле яго слоў, цана паляпшаецца і цалкам магчыма, што дрэнны перыяд завяршыўся. Як паведамляе ТАСС, цытуючы міністра энергетыкі Саудаўскай Аравіі, рынак нафты стабілізаваўся, попыт на нафту застаецца высокім.

Міністр нафтавай і гарнаруднай прамысловасці Венесуэлы Эўлохіа дэль Піна заявіў, што краіна разлічвае на цану нафты ў памеры $60-70 да канца 2016 года. "Патрэбна справядлівая цана, якая забяспечыць інвестыцыі і справядлівы ўзровень прыбытку", - сказаў ён.

Акрамя таго, Эўлохіа дэль Піна адзначыў, што Венесуэлу задаволіць калідор квот ОПЕК у 31-33 млн барэляў у суткі. Іран гатовы супрацоўнічаць з краінамі па-за ОПЕК для каардынацыі на рынку нафты, заявіў міністр нафты гэтай краіны Біжан Намдар Занганэ.

Таксама ён сказаў, што Іран хоча вярнуць сваю долю ў ОПЕК на дасанкцыйны ўзровень у 14,5 працэнта. Праз пяць гадоў Іран плануе нарасціць здабычу нафты да 4,8 млн барэляў у суткі.

Старшыня канферэнцыі ОПЕК Мухамед бен Салех ас-Сада заявіў, што лішак нафты на рынку захоўваецца. Таксама ён сказаў, што ОПЕК абмяркуе кандыдатуру Габона на ўступленне ў картэль, і ОПЕК будзе працягваць дыялог з вытворцамі, якія не ўваходзяць у арганізацыю.

Краіны-імпарцёры чорнага золата на цяперашнім пасяджэнні хочуць абмеркаваць новы паталок здабычы нафты. Мяркуецца, што ўзровень здабычы ўстановяць у 32,4 млн барэляў у суткі. Калі дамоўленасць будзе дасягнута, гэта змякчыць апасенні наконт расколу ўнутры ОПЕК.

Раней перагаворы аб "замарозцы" ўзроўню здабычы нафты праходзілі ў красавіку 2016 года ў сталіцы Катара г. Доха, яны завяршыліся правалам.

2 чэрвеня, перад пачаткам пасяджэння ОПЕК каціроўкі нафты маркі Brent падняліся вышэй за $50 за барэль.

2 чэрвеня 2016, Мінск
БЕЛТА