Саюз прадпрымальнікаў і работадаўцаў Польшчы прапаноўвае даць мільёну мігрантаў, якія знаходзяцца ў краіне, від на жыхарства, 

Гаворка ідзе перш за ўсё пра грамадзян Украіны, Беларусі і В`етнама. Як адзначыў кіраўнік саюза Цэзары Казьмерчак, з-за складанай дэмаграфічнай сітуацыі, а таксама палітычнай сітуацыі ў Еўропе ў інтарэсах дзяржавы прыцягваць і легалізаваць як мага больш імігрантаў з суседніх краін. "Калі мы хочам захаваць цяперашнія тэмпы развіцця з улікам дэмаграфічных тэндэнцыі да 2050 года, мы павінны прыняць 5 мільёнаў імігрантаў", — гаворыцца ў паведамленні.

Грамадзяне дзяржаў — суседзяў Польшчы як нельга лепш падыходзяць для легальнага пражывання ў краіне, лічыць Казьмерчак. Акрамя таго, яны робяць значны ўнёсак у эканамічнае развіццё і павышэнне даходаў польскага бюджэту.

Легалізаваць імігрантаў у краіне саюз прапаноўвае з дапамогай найхутчэйшага прыняцця адпаведнага закона. У прыватнасці, прадпрымальнікі ўнеслі ва ўрад прапанову аб больш хуткім узаконьванні знаходжання ўсіх украінцаў, якія пражываюць у гэты перыяд часу на тэрыторыі Польшчы, што аўтаматычна дасць ім права на пастаяннае пражыванне. Гэты закон варта распаўсюдзіць на беларусаў, в`етнамцаў і грамадзян іншых краін, якія прыязджаюць на працу ў Польшчу, што дазволіць папоўніць недахоп працоўнай сілы, адзначаецца ў заяве саюза.

Ірына Турчына, БелаПАН
Мінск, 29 студзеня 2016