Расія можа даць квоты беларускім кампаніям для вядзення рыбнай здабычы ў сваіх водах, паведаміў у сераду на прэс-канферэнцыі кіраўнік Расрыбалоўства Ілья Шастакоў.

Паводле яго слоў, такія квоты можна прадаставіць рэспубліцы на тых аб’ектах, дзе ёсць няпоўнае асваенне – "з улікам тых дружалюбных адносін паміж Расіяй і Беларуссю".

"Калі беларускія калегі хочуць удзельнічаць, а расійскія кампаніі не да канца гэтыя квоты асвойваюць, у рамках міжурадавых пагадненняў мы нічога дрэннага не бачым", - адзначыў Шастакоў.

Ён звярнуў увагу на тое, што ў Беларусі дастаткова моцна развіта рыбная перапрацоўка, таму новая мера, аб якой гавораць у Расіі, павялічыць у рэспубліку пастаўкі сыравіны.

"Мы недружалюбным краінам у свой час выдзялялі квоты, чаму мы не можам дружалюбным краінам выдзяляць квоты для ажыццяўлення промыслу?" - задаў рытарычнае пытанне кіраўнік Расрыбалоўства.

Найбуйнейшы перапрацоўшчык рыбы ў Беларусі – брэсцкая кампанія "Санта Брэмар". Прывезеныя з РФ, Нарвегіі і Ісландыі ласось, селядзец і іншую рыбу тут здрабняюць, засольваюць і робяць новы прадукт – фаршмакі, ікарное масла, вэнджаную чырвоную рыбу і гэтак далей. Штодня з канвеера сыходзіць больш за 300 тысяч упаковак селядца. Цяпер 60% аб`ёмаў вытворчасці ідзе на экспарт у Расійскую Федэрацыю.

Ілья Шастакоў праінфармаваў, што расійскі экспарт рыбы і рыбнай прадукцыі за 10 месяцаў 2022 года знізіўся на 10%. Адбіліся забарона на пастаўкі крабавай прадукцыі ў заходнія краіны, а таксама зніжэнне экспартнага кошту па крабах і на шэраг іншых морапрадуктаў.

Тым не менш, падкрэсліў кіраўнік Росрыбалоўства, экспарт удалося нарасціць у Кітай, Паўднёвую Карэю, Нідэрланды, Японію і Нігерыю. У спіску асноўных пакупнікоў расійскай рыбы таксама застаецца Беларусь.

Мінск, 28 снежня 2022
Sputnik