Міністр выказаўся наконт заклікаў да забастовак на некаторых інтэрнэт-рэсурсах. "Скажу адкрыта: усяго тыдзень спынення вытворчасці здольны звесці на нішто ўсё, што канкрэтна вы з калегамі зрабілі за апошнія гады. Спыніцца вытворчасць - будуць сарваны кантракты, а значыць, будуць выстаўлены вялікія штрафныя санкцыі, якія лягуць цяжарам на лясгас. У выніку знікнуць дзелавыя партнёры. І тая ніша, якую мы ва ўмовах неверагоднай канкурэнцыі літаральна адваявалі на сусветным рынку, будзе страчана. Ці дапаможа гэта ў вырашэнні палітычнага крызісу? Наўрад ці. Але затое сапраўды паложыць на лапаткі ваша прадпрыемства. І размова ўжо будзе ісці не пра тое, каб атрымліваць высокую зарплату. Паўстане пытанне аб магчымасці яе выплачваць у прынцыпе. Ці гатовы вы да гэтага?" - задаў пытанне ён.

Віталь Дрожжа заклікаў работнікаў лясной галіны падумаць, што дасць забастоўка і чаго яна пазбавіць. "Людзі, якія сапраўды хочуць дабра для краіны і народа, не заклікаюць спыняць работу. Няма ніякай разважлівасці ў тым, каб на караблі, на якім плывеш, рабіць дзірку толькі для таго, каб выказаць свае прэтэнзіі капітану", - заявіў ён.

Міністр адзначыў, што ёсць шмат законных спосабаў выказаць сваю пазіцыю. "Але ў любым выпадку без насілля і правакацыі. Мы павінны слухаць і чуць адзін аднаго. Нам патрэбны дыялог", - упэўнены ён.

"Заклікаю пакінуць палітыку за рамкамі рабочага часу. Для гэтага ёсць выхадныя. А забастоўка - дарога ў нікуды. Спыніць, разбурыць лёгка. Але вярнуцца на ранейшыя пазіцыі ўжо будзе практычна немагчыма. Рынак сёння - вельмі жорсткая сфера адносін. І я прашу вас праявіць разважлівасць і не адмаўляцца ад усяго таго, да чаго мы так доўга разам ішлі. Бо каму як не леснікам ведаць, чым заканчваюцца ўсе ўраганы: вецер сціхае, пыл асядае. І застаюцца стаяць толькі самыя моцныя дрэвы. І я веру, што гэта вы. Няхай у вашых дамах, на вуліцах вашых гарадоў і вёсак заўсёды будуць мір і спакой!" - пажадаў Віталь Дрожжа.

19 жніўня 2020, Мінск
БЕЛТА