"Усе мерапрыемствы, якія рэалізуюцца сёння ў Беларусі, накіраваны на дэмантаж усёй той спадчыны, у тым ліку і ў сацыяльнай палітыцы, якая ў вас засталася, - сказаў Спірыдон Кілінкараў. - Калі паглядзець на постсавецкую прастору, то Беларусь, напэўна, адзіная краіна, якую можна назваць сацыяльнай дзяржавай, дзе ў людзей 8-гадзінны працоўны дзень, дзе захоўваюцца іх працоўныя правы, дзе людзі працуюць на вытворчасцях, няма запазычанасці па заработнай плаце і шмат іншага, чаго даўно няма ў іншых рэспубліках. І тыя, хто ўсё гэта задумалі і рэалізуюць, вельмі добра разумеюць усе наступствы".

Палітык канстатаваў, што нават на ўзроўні тых замежных палітыкаў, якія актыўна выступаюць супраць Аляксандра Лукашэнкі, не прызнаецца перамога апанентаў дзеючага Прэзідэнта Беларусі на праведзеных выбарах, аб якой заяўляе апазіцыя.

"Гэта спроба каляровай рэвалюцыі з мэтай рэалізацыі праграмы максімум - звяржэнне ўлады, а праграма мінімум - аслабіць Беларусь (яна ўсё ж такі сёння з`яўляецца сур`ёзным эканамічным іграком на еўрапейскай прасторы) і атрымаць такім чынам прэферэнцыі для сябе, - лічыць ён. - Калі нехта думае, што гэта ўсё накіравана на дэмакратыю, свабоду і правы тых людзей, якія выступаюць сёння, то не: гэта ўсё пра эканоміку і пра грошы. Наогул пра што б мы ні гаварылі, размова заўсёды ідзе пра грошы. Трэба проста ведаць еўрапейскіх палітыкаў і тых лялечнікаў, якія фінансуюць усе гэтыя падзеі ў Беларусі не проста так, яны ад гэтага хочуць атрымаць свой гешэфт. І заспакойвацца сёння не трэба: усё можа заціхнуць, але праз нейкі час яны зноў і зноў будуць спрабаваць дабівацца тых мэт, якія яны перад сабой паставілі".

"Я хачу яшчэ сказаць асобна пра тых, хто перамог і хто прайграў, - прадоўжыў Спірыдон Кілінкараў. - Калі нехта сёння з удзельнікаў гэтых пратэстаў лічыць, што яны прайгралі Аляксандру Лукашэнку або яго прыхільнікам, то вы крыху пачакайце. Таму што калі Беларусь і далей пойдзе па тым шляху развіцця, якім яна ішла апошнія больш як два дзясяткі гадоў, то вы зразумееце, што няма прайграўшых, ёсць толькі пераможцы. А калі вы пойдзеце па шляху, які быў рэалізаваны ва Украіне і ад якога сёння адхрышчваюцца еўрапейскія палітыкі, то вы зразумееце, што, перамогшы цяпер, вы прайграеце потым. Таму калі Беларусь утрымае свае пазіцыі і будзе развівацца, то прайграўшых у Беларусі не будзе незалежна ад таго, удзельнічалі яны ў пратэстах, або не - пераможцамі будуць усе. А калі ўсё пойдзе па іншаму, разбуральнаму сцэнарыю, то прайграюць усе: і тыя, якія выйшлі супраць Аляксандра Лукашэнкі, і тыя, якія падтрымлівалі яго, і ў цэлым краіна прайграе. Я не збіраюся агітаваць за Аляксандра Лукашэнку, ён самадастатковы палітык, справа ў гэтай гісторыі не пра яго, гэта гісторыя пра краіну, яе суверэнітэт, мадэль эканамічнага развіцця, захаванне сацыяльных правоў і свабод людзей".

Спірыдон Кілінкараў нагадаў таксама аб катастрафічных памылках еўрапейскіх палітыкаў, якія яны дапусцілі адносна іншых краін.

"Еўрапейскія палітыкі дакладна ведаюць, што яны робяць сёння і цяпер, але яны зусім не ведаюць, чым гэта ўсё скончыцца, - упэўнены ён. - Я магу прывесці прыклады Сірыі, Лівіі, Ірака, дзе яны дакладна былі ўпэўнены, што робяць правільна. Чым гэта скончылася? Гэта скончылася гісторыямі з мігрантамі, праблемамі ўнутры Еўропы. Я не помню ні аднаго еўрапейскага палітыка, акрамя Тоні Блэра, які хаця б прызнаў памылкі, якія зрабіла Еўропа адносна гэтых краін, тым самым справакаваўшы крызіс унутры самой сябе. Яны не гатовы прызнаваць свае памылкі, і я лічу гэта абсалютна безадказнай палітыкай. І ў адносінах да Беларусі яны спрабуюць рэалізаваць такі ж сцэнарый. А ў многіх людзей ёсць ілюзія, што іх поспех прыйдзе дарма, што не трэба для гэтага нічога рабіць, дастаткова пабаставаць, выступіць супраць Аляксандра Лукашэнкі, а заўтра Ангела Меркель прыедзе да вас у краіну і кожнаму ў двор загоніць па "Мерседэсу", дасць еўрапейскія зарплаты і г.д. Але грошы з ніадкуль не з`яўляюцца і нікуды не знікаюць. Калі яны знікаюць у адных, то яны з`яўляюцца ў другіх. У гэтым выпадку, я думаю, калі будзе рэалізаваны сцэнарый Украіны, грошы знікнуць у рабочых і з`явяцца ў тых, хто прыватызуе гэтыя прадпрыемствы".

25 жніўня 2020, Масква
Эдуард Півавар - БЕЛТА