На думку кіраўніка МЗС, праз «дзеянні на вуліцах» немагчыма змяніць сітуацыю ў краіне. «Я перакананы (і наўрад ці вы зможаце аспрэчыць), што за апошнія 4-5 гадоў пасля таго, як пачалі аднаўляцца адносіны з ЕС, іншымі заходнімі краінамі, мы дасягнулі большага, чым за папярэднія 16 гадоў санкцый. І зараз, калі мы рэальна пачалі працаваць над дыверсіфікацыяй знешнепалітычнай і знешнеэканамічнай дзейнасці, развіццё падзей па непажаданым сцэнары паставіла б кропку на гэтай сферы. Гэта нікому не трэба, нявыгадна», - сказаў Уладзімір Макей.

Паводле яго слоў, МЗС вядзе вельмі цесны, шчыльны дыялог з Еўрапейскім саюзам. «Вядома, яны выказваюць свае апасенні [з нагоды апошніх падзей, звязаных з правядзеннем выбарчай кампаніі], мы — свой афіцыйны погляд на развіццё падзей. Я іх прашу толькі аб адным: каб, аналізуючы сітуацыю ў Беларусі, яны рабілі высновы на падставе аб’ектыўнага аналізу і пасля гэтага ўносілі прапановы ў свае сталіцы», - падкрэсліў ён.

Уладзімір Макей адзначыў, што некаторыя спрабуюць праводзіць паралелі паміж тым, што адбываецца цяпер, і падзеямі 2010 года. «Запэўніваю вас, што рэжым моцны, спакойны, і мы ўпэўненыя, што сітуацыя будзе пад кантролем. Я разумею, што пасля гэтага будзе шквал крытыкі асабіста ў мой адрас і я буду ў чарговы раз уключаны ў спіс «ворагаў прагрэсіўнага чалавецтва», але, тым не менш, — сказаў міністр. — Калі адбудуцца непажаданыя падзеі, якія адкінуць нас у 2010 год, то трэцяй адлігі не будзе. Аднаўленне нармальных адносін з іншымі краінамі зойме нашмат больш часу, чым пасля 2010 года».

Кіраўнік МЗС падкрэсліў, што Беларусь зацікаўлена ў захаванні канструктыўных адносін з іншымі краінамі. «Перакананы, што ў гэтым павінна быць зацікаўлена і грамадства. Гэта дазволіць нам і пасля выбараў нашмат хутчэй рухацца ў розных сферах і галінах, ва ўдасканаленні заканадаўства, палітычнай сістэмы», — сказаў ён.

Уладзімір Макей таксама пракаментаваў бягучыя падзеі ўнутрыпалітычнай сітуацыі ў краіне, у прыватнасці, затрымання праваахоўнымі органамі аўтараў Telegram-каналаў. Ён звярнуў увагу, што гэтымі пытаннямі павінны займацца кампетэнтныя органы. Паводле яго слоў, ёсць звесткі, якія дазваляюць сцвярджаць, што многія падзеі не маглі паўстаць спантанна, яны былі арганізаваны. Значную ролю ў падаграванне абстаноўкі згулялі фэйкі, якіх стала значна больш у апошні час. «Вялікая колькасць фэйкаў, пра што ўчора казаў і Прэзідэнт, служыць падставай потым для выхаду людзей на вуліцы, — сказаў, звяртаючыся да журналістаў, міністр. — Некаторыя вашыя калегі з незалежных СМІ, Telegram-каналаў неафіцыйна, сарамліва нам кажуць, што ім прапануюць пэўныя сумы за тое, каб яны размясцілі інфармацыю адпаведнага зместу аб адпаведных персонах. Не буду называць прозвішчаў, але яны ў нас ёсць».

Кіраўнік МЗС прызнаўся, што часам з цікавасцю чытае ў Telegram-каналах падобныя «сакрэтныя навіны» пра самога сябе. На адзін з апошніх фэйк прыйшлося афіцыйна рэагаваць з боку МЗС. Гаворка аб інфармацыі пра нібыта існуючы ўклад на імя аднаго з сыноў Прэзідэнта ў швейцарскім банку. «Банк ужо абверг, але мы ўсё роўна афіцыйна запыталі швейцарскі бок, каб яны нам далі гэтую інфармацыю», — распавёў ён.

«Тыя, хто ўкідваюць такую ​​навіну, зыходзяць, напэўна, з таго, што адбываецца ў іх краінах. Не сакрэт, што ў многіх дзяржавах сам працэс знаходжання ва ўладзе звязаны з узбагачэннем. Хачу сказаць, што ў Беларусі такога не было, няма і не будзе», - дадаў кіраўнік МЗС.

Акрамя таго, міністр парэкамендаваў больш акуратна выкарыстоўваць такога роду паняцці, як «палітычныя зняволеныя», і прымаць пад увагу інфармацыю праваахоўных органаў аб супрацьпраўных дзеяннях асобных асоб. «Калі былі здзейснены нейкія дзеянні, напэўна на гэта былі важкія падставы, — сказаў ён. — Напэўна былі ўзважаныя ўсе за і супраць і было прынята адпаведнае рашэнне».

Звязда, 26 чэрвеня 2020