Подпісы пад дакументам у рэжыме анлайн-цырымоніі паставілі Старшыня Прэзідыума НАН Беларусі Уладзімір Гусакоў і Прэзідэнт Акадэміі навук правінцыі Гуандун Ляа Бін.

У рамках ініцыятывы “Адзін пояс, адзін шлях” бакі дамовіліся аб тым, што падначаленыя ім арганізацыі створаць сумеснае прадпрыемства - таварыства з абмежаванай адказнасцю “Кітайска-Беларускі інавацыйны Цэнтр прамысловых тэхналогій”. Ён размесціцца ў нядаўна пабудаваным будынку Інавацыйнага цэнтра ў Кітайска-Беларускім індустрыяльным парку "Вялікі камень".

У рамках дзейнасці Цэнтра беларускія і кітайскія навукоўцы плануюць сумесна выконваць навукова-даследчыя і доследна-канструктарскія работы, ажыццяўляць дзейнасць у якасці інкубатара для навукова-тэхнічных праектаў, аказваць кансультацыйныя паслугі на камерцыйнай аснове. Бакі перакананыя, што стварэнне Цэнтра дазволіць ім ажыццяўляць сістэматычнае навукова-тэхнічнае супрацоўніцтва і абмен навукова-тэхнічнымі дасягненнямі для наступнай іх мадыфікацыі і трансферу.

Даследчыкаў НАН Беларусі і правінцыі Гуандун звязваюць даўнія навуковыя сувязі: падпісана каля 40 пагадненняў і пратаколаў (мемарандумаў) аб супрацоўніцтве з арганізацыямі і дзяржаўнымі структурамі правінцыі Гуандун. Створаны два сумесныя Цэнтры.

Надзея Нікалаева
Звязда, 18 траўня 2020