Аб`ёмы паставак нафты з Казахстана ў Беларусь будуць вядомыя пасля падпісання адпаведнага пагаднення, паведаміў у аўторак журналістам намеснік міністра энергетыкі Казахстана Асэт Магаўаў.

Пасол Казахстана ў Беларусі Аскар Бейсенбаеў напярэдадні заявіў аб тым, што пагадненне аб пастаўках нафты ў РБ можа быць падпісана да кастрычніка.

"Яно (пагадненне) яшчэ ў працэсе абмеркавання, аб`ёмы толькі потым - пасля падпісання. Там яшчэ ёсць адно пытанне, якое трэба ўзгадніць, у залежнасці ад яго будзем глядзець на падпісанне. Аб`ёмы не абмяркоўваюцца, абмяркоўваецца толькі тэкст пагаднення, умовы паставак" , - распавёў намеснік кіраўніка Мінэнерга РК.

Спыталі намміністра і пра тое, ці будуць ажыццяўляцца пастаўкі праз расійскую тэрыторыю.

"Так, вядома, з расійскага боку не патрабуецца адабрэння, гэта ж у рамках у Еўразійскага эканамічнага саюза", - растлумачыў ён.

Беларусаў, паводле яго слоў, у першую чаргу цікавіць сыравіна для перапрацоўкі на НПЗ. Гатовыя прадукты, адзначыў Магаўаў, Мінск не цікавяць.

Распавёў у аўторак падрабязнасці пра перамовы і намеснік кіраўніка "Белнафтахіма" Уладзімір Сізоў. Ён адзначыў, што сёння ідзе падрыхтоўка адпаведнага пагаднення.

"Мы разумеем магчымыя маршруты дастаўкі - гэта можа быць выкарыстанне агульнай сістэмы магістральных нафтаправодаў, гэта можа быць пастаўка і чыгункай", - растлумачыў намеснік кіраўніка канцэрна.

У Беларусі, нагадаў Сізоў, ёсць досвед пастаўкі сыравіны па чыгунцы з Казахстана. Паводле яго слоў, у пачатку 2000-х была часовая прапампоўка нафты для беларускіх НПЗ.

Мінск, 17 верасня 2019
Sputnik