Беларусь і Кітай падпісалі пагадненне аб выдзяленні кітайскім бокам ільготнага крэдыту на рэалізацыю першага этапу праекта па арганізацыі высокатэхналагічнай аграпрамысловай вытворчасці поўнага цыклу ў Беларусі. Дакумент падпісаны 9 лютага ў рамках рабочага візіту ў Пекін міністра эканомікі Уладзіміра Зіноўскага. 

Візіт праходзіць 8—11 лютага. У яго межах Зіноўскі таксама сустрэўся з прадстаўніком Міністэрства камерцыі КНР на міжнародных гандлёвых перамовах, намеснікам міністра камерцыі Фу Цзыінам.

"Удзельнікі сустрэчы абмяняліся думкамі па актуальных пытаннях гандлёва-эканамічнага супрацоўніцтва, абмеркавалі перспектывы прасоўвання кітайска-беларускага індустрыяльнага парку "Вялікі камень" і ўдзел Беларусі ў першай Кітайскай міжнароднай выставе імпарту, — адзначылі ў прэс-службе. — Уладзімір Зіноўскі падзякаваў кітайскаму боку за аказаную Кітаем Беларусі тэхніка-эканамічную дапамогу".

Таксама 9 лютага Зіноўскі сустрэўся з віцэ-прэзідэнтам Банка развіцця Кітая Чжан Сюгуанем. Удзельнікі сустрэчы абмеркавалі вынікі фінансавання сумесных праектаў з фінансавай падтрымкай з боку Банка развіцця Кітая і пытанне адкрыцця прадстаўніцтва банка ў Беларусі.

Беларусь у 2018—2023 гадах прыцягне ільготны ўрадавы крэдыт Кітайскай Народнай Рэспублікі на 15 гадоў для рэалізацыі першага этапу інвестыцыйнага праекта "Арганізацыя высокатэхналагічнай аграпрамысловай вытворчасці поўнага цыклу на 2016—2032 гады".

Гэта прадугледжана пастановай Саўміна ўрада ад 7 лютага 2018 года № 105. Аб`ём крэдыту складзе 1 млрд 750 млн кітайскіх юаняў (279,5 млн долараў ЗША). Гэтым жа дакументам ухвалены праект адпаведнага кітайскага пагаднення.

У жніўні 2016 года Аляксандр Лукашэнка падпісаў указ аб стварэнні паблізу Рудзенска (Мінская вобласць) на плошчы каля 160 гектараў высокатэхналагічнага аграпрамысловага комплексу поўнага цыклу з акцэнтам на вытворчасці кармоў і кармавых дабавак.

У Пухавіцкім раёне плануецца пабудаваць заводы па вытворчасці амінакіслот — лізіну, трэаніну і трыптафану, а таксама заводы па выпуску камбікармоў, па перапрацоўцы насення алейных культур, комплекс збожжасховішчаў, аўтакамбінат.

Рэалізацыю праекта ажыццяўляе ЗАТ "Беларуская нацыянальная біятэхналагічная карпарацыя", якая атрымала ў сувязі з гэтым шэраг падатковых ільгот і прэферэнцый.

Аляксей Аляксандраў, БелаПАН
Мінск, 9 лютага 2018