Беларусь і Сербія ў 2018—2019 гадах прафінансуюць 10 сумесных навуковых і навукова-тэхнічных праектаў. Як паведаміла прэс-служба, такое рашэнне прынята 20 снежня ў Мінску па выніках восьмага пасяджэння сумеснай Беларуска-сербскай камісіі па навукова-тэхнічным супрацоўніцтве пад старшынствам намесніка старшыні Дзяржаўнага камітэта па навуцы і тэхналогіях Беларусі Сяргея Шчарбакова і намесніка міністра адукацыі, навукі і тэхналагічнага развіцця Сербіі Сашы Стаянавіча.

Праекты абраныя па прыярытэтных кірунках двухбаковага супрацоўніцтва (нанаматэрыялы; лазерныя тэхналогіі; оптаэлектроніка; фізіка-матэматычныя навукі; сельская гаспадарка; энергазберагальныя тэхналогіі; біятэхналогіі; экалогія і ахова навакольнага асяроддзя; хімічныя тэхналогіі).

У ходзе мерапрыемства абмяркоўваліся пытанні пашырэння і актывізацыі навукова-тэхнічнага і інавацыйнага супрацоўніцтва паміж краінамі. Па выніках пасяджэння бакі падпісалі пратакол і выканаўчую праграму навукова-тэхнічнага і інавацыйнага супрацоўніцтва на 2018—2019 гады.

Беларуска-сербскае навукова-тэхнічнае супрацоўніцтва ажыццяўляецца ў рамках пагаднення паміж урадам Беларусі і Саюзным урадам Саюзнай Рэспублікі Югаславія ад 6 сакавіка 1996 года.

Марына Носава, БелаПАН
Мінск, 20 снежня 2017