Улічваючы задачы па развіцці рынку каштоўных папер і прыцягненні сродкаў для рэфінансавання дзярждоўгу, Міністэрства фінансаў Беларусі ў 2017 годзе прапануе да продажу новыя выпускі дзяржаблігацый для юрыдычных і фізічных асоб.

Мінфін паведамляе, што з 15 студзеня па 30 снежня 2016 года рэалізавана дзяржаўных доўгатэрміновых аблігацый Рэспублікі Беларусь, намінаваных у замежнай валюце, на 1 млрд 392,4 млн долараў ЗША ў эквіваленце, у тым ліку ў гандлёвай сістэме Беларускай валютна-фондавай біржы на 300 млн долараў ЗША.

Акрамя таго, прададзена ДДА, намінаваных у беларускіх рублях, на 160 млн рублёў, у тым ліку ў гандлёвай сістэме біржы на 100 млн рублёў.

Паводле дадзеных Мінфіна, па выніках 2016 года фізічнымі асобамі ў гандлёвай сістэме Беларускай валютна-фондавай біржы набыта дзяржаблігацый, намінаваных у замежнай валюце, на 70,4 млн долараў і дзяржаблігацый, намінаваных у беларускіх рублях, на 110 тыс. рублёў.

Нагадаем, дзяржаўны доўг Беларусі на 1 снежня 2016 года склаў 36,8 млрд рублёў і павялічыўся ў параўнанні з пачаткам года на 3,9 млрд рублёў, або на 12%.

Пры гэтым знешні дзярждоўг па стане на 1 снежня склаў 13,5 млрд долараў ЗША, павялічыўшыся з пачатку года на 1 млрд 71,6 млн долараў, або на 8,6%.

Унутраны дзяржаўны доўг па стане на 1 снежня склаў 10,1 млрд рублёў, павялічыўшыся з пачатку года на 0,4 млрд рублёў (з улікам курсавых розніц), або на 4,1%.

У 2017 годзе Беларусі неабходна накіраваць на пагашэнне дзяржаўнага доўгу 5 млрд 232,2 млн рублёў. Пры гэтым пагашэнне дзяржаўнага доўгу ў замежнай валюце складзе 2 млрд 311 млн долараў ЗША.

Аляксей Арэшка, БелаПАН
Мінск, 3 студзеня 2017