Васільеў выступіць на пасяджэнні камісіі з дакладам па пытанні супрацоўніцтва дзяржаўных прадпрыемстваў, а таксама абмяркуе з прадстаўнікамі Камітэта па кантролі і кіраванні дзяржмаёмасцю пры Дзяржсавеце КНР бягучыя пытанні ажыццяўлення і актывізацыі работ па пілотным пераліку беларускіх арганізацый з папярэднімі ўмовамі ўваходжання кітайскіх інвестараў у іх акцыянерны капітал.

Сустрэча і перамовы з кітайскімі калегамі, адзначылі ў прэс-службе ДКНТ, арганізаваны ў мэтах рэалізацыі рамачнага пагаднення аб супрацоўніцтве і механізмах узаемадзеяння паміж Дзяржаўным камітэтам па маёмасці Рэспублікі Беларусь і Камітэтам па кантролі і кіраванні дзяржмаёмасцю пры Дзяржсавеце КНР, падпісанага ў верасні 2016 года ў Пекіне ў прысутнасці кіраўнікоў дзяржаў Аляксандра Лукашэнкі і Сі Цзіньпіна.

Гэта першы сумесны міжведамасны беларуска-кітайскі дакумент па развіцці і паглыбленні інвестыцыйнага супрацоўніцтва дзвюх краін, які прадугледжвае не толькі цеснае ўзаемадзеянне паміж камітэтамі, але і актыўны ўдзел у ім галіновых міністэрстваў і іншых арганізацый, падпарадкаваных ураду Беларусі, прадстаўнікі якіх увайшлі ў склад рабочай групы. З кітайскага боку рабочая група ўключае прадстаўнікоў Камітэта па кантролі і кіраванні дзяржаўнай маёмасцю пры Дзяржаўным савеце Кітайскай Народнай Рэспублікі.

План рэалізацыі пагаднення бакі абмеркавалі ў Мінску 27 снежня 2016 года на першым пасяджэнні рабочай групы.

Пілотны пералік беларускіх арганізацый з папярэднімі ўмовамі ўваходжання кітайскіх інвестараў у іх акцыянерны капітал быў сфарміраваны ў пачатку гэтага года і ў лютым 2017 года перададзены на разгляд кітайскаму боку. У яго ўключана 22 беларускія прадпрыемствы, у тым ліку "Гарызонт", "Магілёўхімвалакно", МТЗ, "Гомсельмаш", БАТЭ — кіруючая кампанія холдынгу "Аўтакампаненты".

У цэлым чакаецца, што рэалізацыя рамачнага пагаднення дасць магчымасць перайсці ад крэдытнага інвеставання да прамога інвеставання ў канкрэтныя прадпрыемствы і паглыбіць узаемадзеянне паміж канкрэтнымі арганізацыямі, адзначыла прэс-служба.

Пра тое, што Кітай разглядае прапанову аб інвестыцыях у ААТ "Гарызонт", "Віцязь", "БАТЭ", "Гомсельмаш" і іншыя беларускія дзяржпрадпрыемствы, Аляксей Васільеў паведаміў 21 лютага на прэс-канферэнцыі ў Мінску. Паводле яго слоў, кітайскаму боку перададзеныя прапановы па прыватызацыі ў агульнай складанасці 22 беларускіх дзяржарганізацый і адзін інвестпраект. "Гэта тыя арганізацыі, дзе б мы хацелі бачыць інвестараў. Мы вызначылі сваё бачанне супрацоўніцтва, і гэта не толькі продаж акцый, але і ў тым ліку магчымасць уваходжання ў капітал шляхам дадатковай эмісіі. Мы разумеем, што ў асобныя моманты патрабаваць ад інвестара і купіць акцыі, і ўкласці ў мадэрнізацыю не зусім правільна, таму і прапанаваная дадатковая эмісія. Такім чынам інвестар мае магчымасць улівання грошай непасрэдна ў само прадпрыемства, атрымліваючы пры гэтым частку акцый", — растлумачыў чыноўнік.

Паводле яго слоў, па кожным з прапанаваных прадпрыемстваў працэнты акцый розныя. "Калі мы прапаноўваем такія сур`ёзныя прадпрыемствы і чакаем сур`ёзных інвестараў, у тым ліку з Кітая, мы гатовыя прадаць і больш за 50% акцый дзеля таго, каб прадпрыемствы атрымалі інвестыцыйны капітал", — заявіў Васільеў.

Марына Носава, БелаПАН
Мінск, 10 красавіка 2017